أحمد عبد المنعم كتب:السلام عليكم ورحمة الله وبركاته ..
في البداية اسمحوا لي أن أتكلم بالعامية ..
الموضوع ده مش عشان نتناقش مين أفضل في الشركات الموجودة دلوقتي .. ومين مش أفضل ... والكلام إللي لا يودي ولا يجيب ده
الموضوع ده كمان مش عشان نتناقش ليه الناس بتستخدم منتجات مغلقة المصدر ومش مفتوحة المصدر بزعم أن أحدهما أفضل من الأخر .. لأنه برضه كلام لا يودي ولا يجيب وتضييع وقت
الموضوع ده من الأخر عشان لازم نعترف كلنا بحقيقة واحدة .. هي إننا مش الأفضل! لكن هما الأفضل! إن المسلمين والعرب مش أفضل! وإن الغرب أفضل!
الموضوع ده عشان نفوق شوية من النقاشات البغيضة إللي بتضيع وقت عشان نتناحر نشوف مين تكنولوجيته أو أداته أفضل من غيرها! وده مش عشان أقنع الطرف الأخر إنه يشتغل بيها عشان ميضيعش وقته مثلاً أو عشان يتعلم حاجة جديدة ساعتها ممكن نقول ده نقاش محمود. لكن النقاش بيبقى عشان لما أجي أنام أحس براحة نفسية! أو عشان أحس بالفوقية العلمية أو التعالم!!! فعلاً تضييع وقت
إحنا بنضيع وقت في شوية نقاشات لو استغلنيها في أي حاجة تانية كان أفيد!
طبعاً واحد هيخش يقولي النقاش ده مفيد .. والخلاف في الرأي رائع .. وإحنا لازم ... !! هقوله ممكن بعد إذنك أسألك سؤال .. هو إنتا لما بتدخل موضوع من دول .. بيبقى غرضك معرفة ولا غرضك إفحام الأخر؟ بيبقى عندك استعداد تغير قناعاتك الشخصية ولا داخل تتمنظر؟! بيبقى عندك استعداد تنزل لينوكس على جهازك بدل الويندوز ولا داخل تشتم وخلاص؟ بيبقى عندك استعداد تنزل الويندوز بدل أي حاجة تانية ولا داخل تنطط وخلاص؟!
أنا مش هخش في نوايا حد .. بس معظم النقاشات بينقلب في الأخر لصراع لا يسمن ولا يغني من جوع .. لمجرد إثبات الفوقية العلمية. إلا من رحم ربي طبعاً لأن أكيد في ناس عايزة تتعلم.
أنا هنا مش بهاجم حد .. بس بطلب مننا نفوق شوية.
تعالوا نبص على شوية حقايق ..
1) ميكروسوفت أفضل .. ولا مش أفضل؟ أه أفضل .. على فكرة أنا أقسم بالله إني مداخل أعمل دعايا لأي شركة من دول ولا يهموني في حاجة أصلاً عشان بس محدش يخش يقولي دعايا والكلام الجميل ده. ليه بقا هي أفضل .. لأنها مخليانا نتناقش هي أفضل ولا مش أفضل؟! نتناقش ليه نستخدم منتجاتها؟ نتناحر في منتجاتها؟ نستخدمها وبشغف؟ العالم النسبة العظمى فيه بيشتغل تحت منصتها؟ من الأخر هي الأفضل وكلنا عارفين ده بس بنكابر .. ودايماً لما بنكابر مش بنبص على الحقيقة .. هنا أنا بتكلم على أرقام ونتائج .. مش أفضل يعني عشان أنا راجل دوت نت .. ولا أنا عايز أقلب الترابيزة على الكل ... ومش شرط على فكرة تكون الأفضل عشان برامجها رائعة! أو عشان أي حاجة من الكلام ده! خالص! إنتوا فاهمين البزنس بطريقة غريبة بصراحة لما بقرا النقاشات بحس إني قاعد في الفضاء! بقول لنفسي هو ليه الناس مش حسة بإللي بيحصل حواليها وعمالة تناقش مسلمات ملهاش لزمة!
الحقيقة دي .. مش معناها إننا نشتغل بمنتجات ميكروسوفت .. أنا مش فرحان إننا مجرد ناس بتستنى الشركات تنزلها حاجات تشتغل بيها إذا كانت ميكروسوفت ولا جوجل ولا أوراكل ولا سان ولا غيرها .. أنا فعلاً مضايق إننا مش بنحاول نعمل قوة إقتصادية حتى لو بمنتجات الناس دي في البداية
2) ميكروسوفت بدأت تتراجع في مجالات معينة لما نزلها منافسين حقيقين .. مع إن كل المنافسين بما فيهم ميكروسوفت وجوجل وأوراكل وأبل إحتكاريين من الدرجة الأولى .. بس لما نزل منافسين حقيقين لميكروسوفت في مجالات معينة البساط اتسحب من رجليها.
وده حقيقة برضه لازم كلنا نستشعر منها الأتي .. إن العملية مش صعبة! مش عشان ميكروسوفت تبقى لا تهزم في سباق تكنولوجي أو سباق تسويقي أو أياً كان المسمى! وده يدينا أمل إننا ممكن نعمل حاجة.
أنا شايف أكبر منافس دلوقتي لميكروسوفت (خاصة إن ميكروسوفت بتنتج منتجات كتير جداً) فأنا بتكلم هنا على ال trend الويب وال cloud والحاجات دي يعني .. هي جوجل .. والحرب الشرسة بينهم وواضحة .. وإحنا لازم نتعلم من الحرب دي حاجات كتير غير النقاشات البغيضة المتعصبة بدون داعي وبدون وعي .. هي إن الشركات ميهمهاش غير البزنس .. لو كسبت 100000 من غير متعمل حاجة عدلة يبقى أحسن من أي شركة تانية كسبت 100 حتى لو عملت لبن العصفور.
3) الحقيقة بقا التالتة ودي مهمة جداً .. هي إن ميكروسوفت متحكم في اقتصاد دول كتير وإن كنت هقول اقتصاد العالم فمش هبالغ .. عارفين ليه ميكروسوفت عمرها مهتقع .. في كام واحد معتمد على منتجات ميكروسوفت في العالم .. محدش يقدر يقول بسبب ال piracy بس لو بصينا على الإحصائيات العالمية هتلاقي العدد مهول .. وده في أماكن حساسة كتير في كل الدول .. سيبك يا سيدي من كل الدول .. تعالى نتكلم على مصر .. تخيل كدة في يوم قالك ميكروسوفت قررت تقفل وأشهرت إفلاسها .. ومنتجاتها كلها كدة خلاص بح! إيه إللي ممكن يحصل؟ شوف كام حاجة هتقف في البلد وشوف أسهم البورصة إللي هتقع وشوف الاقتصاد إللي هيدمر .. وأنا مش ببالغ .. لأننا صاحيين نايمين هنا على منتجاتها من ويندوز لأوفيس لويندوز سيرفر لشركات بتاكل عيش من إنتاجها لبرامج على منصاتها لشركات دعم فني ...... إلخ
عارفين نستنتج إيه من الكلام ده .. إن الشركات عموماً ميكروسوفت وغيرها .. قدروا يتحكموا في الإقتصاد العالمي أو جزء منه يعني .. هو إحنا ليه منبقاش كدة؟ في أمل بدل ميكروسوفت وأبل وجوجل وغيرها بقوا كدة .. يبقى في أمل نعمل كدة ولا لأ؟! في أمل إن شاء الله
أنا مش عايز الناس تقاطع ميكروسوفت وتروح لأي حاجة تانية .. ولا عايز إللي مع شركة تانية يسيبها ويروح لميكروسوفت .. أنا عايز إننا نفوق ونرحم نفسنا شوية من سياسة الديوك دي .. ونفكر إزاي ممكن نبقى زي الناس دي!
وإزاي في يوم من الأيام يبقوا منافسين صغيرين لينا!
صدقوني إحنا نقدر .. بس عارفين كلمة السر إيه بعد لا إله إلا الله طبعاً ...
التركيز = القوة
Focus = Power
وإحنا الحمد لله مركزين على النقاشات اللي لا بتودي ولا بتجيب .. وتلاقي الرسائل بتنهال من 100 ل 200 بوست ولا كأننا بنحارب ..
تعالوا نشوف ممكن نعمل إيه؟ إزاي نطور؟ إزاي نبقى قوة تفخر بيها الأمة؟ وسيبونا من مين الأفضل ومين الأحسن ومين الأقوى .... المهم إحنا هنبقى إيه وإزاي.
ملحوظة:
1)أقسم بالله مرة أخرى أنا مش داخل أعمل دعايا ولا قصدي أجرح في أي شخص بعينه ولا أي شيء ولكن فعلاً أنا بدأت أضيق ذرعاً من الشباب العربي والمسلم إللي طول الوقت منغمس في حاجات بتضيع وقته وممكن نستغلها في حاجات أقوى وأفضل بإذن الله.
2) أه أنا بشتغل بمنتجات ميكروسوفت .. وساعات بدافع عن بعض منتجاتها إللي بتبهرني وبتبهر غيري .. بس ده مش معناه إني هموت للدفاع عنها .. دي مجرد وسيلة عشان نتعلم ونوصل بيها للغاية .. مش عيب إني أشتغل بتكنولوجيا شركات أو غيرها عشان أوصل لإلي عايزه .. لغاية منقدر يبقى عندنا تكنولوجيات خاصة العالم كله يستخدمها
جزاكم الله خيراً
عفواً الشب بشتغل في مايكروسوفت عشان يقيمها؟؟؟
