السلام عليكم ..
أرجوكم أريد كود بسيط ليمكنني من التالي
اذا كان عندي مثلا فورم 1 , و فورم 2 و فورم 3
ويبدأ البرنامج بفورم 1 .. و وضعت فيه زر .. ما أريده هو أن عندما اضغط على هذا الزر .. أن يظهر فورم 2 أو فورم 3 ..
يعني بصورة عشوائية .. ممكن أن يظهر فورم 2 , وإذا اغلقت البرنامج وأعدته ,, يظهر فورم 3 وهكذا ..
أرجو أن تكونوا فهمتم ما أريده..
في انتظار مساعدة الأخوة
أخوكم أحمد
أول هام، موضوع توليد الرقم العشوائي بين رقمين أوهما 2 و ثانيهما عدد الفورمات، و السبب في أن رقم البداية 2 و ليس 1، أن الفورم الأولى محملة بالفعل و أنت تريد تحميل أي فورم تانية بطريقة عشوائية، و الرقم الأخير يمثل عدد الفورمات الموجودة، فمثلا لو عندك 10 فورمات، يكون الرقم الأخير فى النطاق 10، و الطريقة اللي بأقترحها تعتمد على تسميتك للفورمات التسمية الافتراضية ، يعنى Form1,Form2,...Form#n
للحصول على عدد الفورمات
1- باستخدام Forms.Count و كن دة بيتطلب ان كل الفورمات تكون متحملة فعلا فى الذاكرة (باستخدام أمر Load مثلا)
2- تحديد عدد الفورمات فى ثابت Constant لأنك تعرف عددها مسبقا (بفرض انك لن تحمل فورم جديدة باستخدام أمر dim frmX as new FormX مثلا)
بعد كدة الطريقة السهلة دي
Dim MyFrmnum MyFrmnum= Int((frmsCount * Rnd) + 2)
على فرض أن المتغير frmsCount بيمثل عدد الفورمات
بعد كدة الزق الرقم دة مع الثابت "Form" و لو فرضنا أن الرقم طلع 4 فيكون الناتج Form4 و بعد كدة استخدم الوظيفة CallByName و مرر لها اسم الفورم دة و انك حتنفذ الوظيفة Show للفورم دي.
و انا كنت حطيت مشاركة لشرح CallByName فى المنتدى دة قبل كدة، و منعا للتكرار و لضيق الوقت، استخدم خدمة البحث فى المنتدى للوصول للمشاركة.
و أرجو أكون فهمت قصدك صح، و أمر يا قمر أنا في الخدمة
ملحوظة، بالنسبة لطريقة الكلام، و اللغة العامية، هل تفضل لو أكلم بالفصحى و بأكثر الأساليب إتزاناً و إلتزاماً بقواعد الصرف و النحو و المحتوى كلام فارغ و ما يوصلكش لحاجة، و شوية نصائح عن كونك لازم تحاول بنفسك الاول و ما تطلبش من الاعضاء عمل كذا و مذا، و عيب و مش عيب و حاجات كتيرة من اللي الواحد صادف منها كتير من الكلامنجية اللي ما وراهمش الا الكلام و ميحركوش صباع عشان يعملوا حاجة فعلا، كلام و كلام و كلام و بس.
و عذرا للاطالة، و تحميلك همومي الشخصية، بس قلت أفضفض، و سلامي (f)
ألـــــــــف شكر يا Roka
أنا لسه مجربتش الطريقة .. بس هحاول استوعبها دلوقتي و أطبقها ..
شكرا مقدما ولو احتجت حاجة هقولك :)
وبالنسبة للكلام بالعامية أو الفصحى .. و الله أنا كتبت بالفصحى على اعتبار ان المنتدى بيدخله أخوة كتير من الخليج والشام و غيرهم اللي مش بيفهموا اللغة العامية .. ف قولت يعني عشان كله يفهم ..
بس أكيد بما إني و أنت مصريين .. فا أكيد المخاكبة بيننا بالعامية هتكون أسهل في الفهم ..
ولو على موضوع أجرب بنفسي و أحاول.. فصدقني والله حاولت كتير في الكود ده و دورت في الهلب , و في المنتدى .. وملقتش حاجة.. فا قلت ألجألكم :)
وسيييييييبك يا سيدي من اللي يضايقك .. و صدقني أحلى مبدأ تمشي عليه في حياتك:
كــــــــــبر دماغـــــك :)
شكرا مرة تانيه عالمساعدة
انت تأمر بس فى اي وقت، و ربنا يسهل و نقدر نخدم، و على فكرة ما قصدتكش انت بالكلام اللي فى الفقرة الاخيرة، قصدي دة الكلام الى ممكن تصادفه من قلة من الاعضاء الكلامنجية، عشان تعمل حسابك و ما تتصدمش منهم.
و انا حاليا مطبق كلامك، حتى بض على توقيعي
و السلام ختام(f)
شكرا على الرد السريع :)
والله أنا محرج جدا.. بس الحقيقة .. معرفتش أطبق الطريقة..!
بص أنا مش خبير في الفجوال بيسك يعني و لسه مبتدئ.. كل الموضوع إني بعمل مشروع أقدمه لقسم الكمبيوتر في الكلية ..
المشروع عبارة عن مسابقة أسئلة .. أنا هعمل فورم واحده .. و هحط في الفورم دي 10 أسئلة عبارة عن 10 Labels .. و هخليهم كلهم invisible و بمجرد ما تبدأ الفورم .. عايز واحد بس يبقى visible .. و هحط زر في نص الفورم .. وظيفته إنه يجيب السؤال اللي بعده .. عشوائيا برضو .. بحيث إنه يعرض عشر أسئله من غير تكرار..
مش عارف فهمتني ولا لأ .. بس ياريت لو مفهمتش قصدي .. أو لو الموضوع طويل ومحتاج شرح كتير و هيعطلك.. قوول ومتخافش مش هزعل .. :) .. الموضوع مش حيوي قوي.. أنا عملت البرنامج خلاص أصلا بترتيب دائم للإسئله .. وتبدأ بنفس الترتيب علطول يعني.. بس قلت لو كانت عشوائية هتكون ألذ شوية :) ..
شكرا للمره التانية.. و ياريت تكتبلي الكود عشان أنا معرفش أي كودات غير البسيطه يعني :)
آااااااسف ع التطويل والإزعاج :)
أااااااالف شكر!!!!
طبعا ياعم.. إنت فهمت المره دي قصدي ونص
الفورم فيها كل اللي أنا عاوزه وزيادة..
الله يباركلك يا بني :)
,,,
بغض النظر عن البرنامج و الكودز والشغل كله ..
التعليقات اللي في الفورررم .. فظييييييييييعه مووووت :) .. أنا قعدت اضحك عليها ونسيت أنا كنت عايز إيه من البرنامج :) ليك مستقبل ياباشا!
...
طنّش .. تعّش .. تنتعش!!! :)))
سلاااااااام يا هندسه..
والف شكر
:o الله يخليك يا أبو الذوق كله، و أنا مبسوط ان قدرت أعمل حاجة، و انت بس تأشر يا ذوق.
و الله كلامك حكم، حتى بعد اذنك، اقتبسته فى توقيعى.
و السلام ختام.(f)
هذا الموضوع مغلق.
المتواجدون خلال آخر دقيقتين · يتحدّث كل ٣٠ ثانية
جارٍ التحقق من المتواجدين…