هل علم الرياضيات اساسي لكى اكون مبرمج

وعليكم السلام ورحمة الله وبركاته،

اخي الفاضل علم الرياضيات لا غنى عنه لاي نوع اخر من العلوم سواء البرمجة او غيرها.

ولكن الافضل بالنسبة لوضعك ان تأخذ منه حاجتك وعدم التوسع، اذا كنت تبحث عن احتراف البرمجة في مجال معين فلا داعي لاضاعة الوقت في الجامعه (قد يخالفني الكثير في هذا الرأي).الدراسة الجامعية تفيد بشكل اساسي من سيواصل دراسات عليا وعمل ابحاث متخصصة فلا بد ان يكون لديه خلفية اكاديمية وتغطية لمعظم مفردات العلم المختلفه.

من الان حدد نوع التطبيقات الذي تريد ان تعمل فيه (انترنت، قواعد بيانات، ...الخ) طبعا يعتمد هذا بشكل اساسي على سوق العمل وعلى ميولك، ابدا بدراسة اساسياته عن طريق دورات في مكان متميز، ادرس بعدها (من كتب ومراجع متخصصة) لغرض اخذ الشهادات العالمية المتعلقة بالمجال الذي اخترته (مايكروسوفت، جافا ، اوراكل ...الخ ) وفي نفس الوقت حاول ان تتدرب في شركة كبيرة او على الاقل بشكل ذاتي عن طريق عمل عدة مشاريع. ستجد نفسك بعد سنتين مستواك في المجال الذي اخترته افضل بكثير من معظم خريجي الجامعه (طبعا يعتمد على اجتهادك ولغتك الانجليزيه ).

بالنسبة للرياضيات كما ذكرت خذ منها بقدر حاجتك (عندما ترى كتاب برمجة يتحدث عن نقطة معينة في الرياضيات لا تعرفها - اوقف القراءة وارجع الى كتاب رياضيات لتفهم هذه النقطة اولا ومن ثم تابع قراءة كتاب البرمجه).

بالتوفيق،

اساسيات الرياضيات الجامعية ضرورية في البرمجة, لعل اهم ما في الرياضيات و له علاقة مباشرة بالبرمجة هو المنطق و الـ discrete mathematics

بعض فروع الرياضيات ضرورية لبعض فروع البرمجة, مثلا linear algebra ضرورية لبرمجة الجرافكس

أنا طالبة بكالوريوس علوم حاسب ودرست أكثر من لغة برمجة

حتى لو كان بشكل غير متعمق

كل لغة تختلف حاجتها عن الأخرى في مجال الرياضيات

مثلا اللغات المنخفضة المستوى كالاسمبلي ولغة الاله فهي تحتاج الى معرفة كبيرة في أنظمة العد .. ( النظام الثنائي .. والثماني والسادس عشري ......... )

أما لغات الهاي ليفيل فقد تحتاج فقط الى علم المنطق فهو على أساسه بنيت البرمجة

كذلك ربما قد تحتاج الى معرفة بالمعادلات والتفاضل فقد تحتاجها في البرامج الحسابية

والى الجبر في برامج الجرافيكس والرسوم

هكذا بشكل مختصر من وجهة نظري الشخصية

بالتوفيق ..

جزاكم الله خيرا على هذه الردود السريعة

بص يا سيدي ..

الموضوع بإختصار شديد .. شوف إنت عاوز إية في البرمجة .. دايماً في كليات البرمجة بيبقى في إتجاهين أساسيين ..

يا إما إتجاه علوم الحاسب .. و دة بتاع الناس إللي بتدرس الكمبيوتر ذات نفسه .. يعني ليهم في البروسيسور و ليهم في نظم التشغيل و بيبرمجوا و كدة .. الجماعة دول محتاجين رياضة كتير أوي .. حاجة زي الجرافكس .. محتاجة رياضة كتير أوي .. لازم تبقى ليك في الجبر و حساب المثلثات و المتجهات و كدة .. ممكن تعمل برنامج بتاع تحليل الصوت أو برنامج مونتاج .. أو حاجة فيها ذكاء إصطناعي .. لازم تبقى جامد في الرياضة .. تتعلم بقى التحليل الفوريري و المعادلات التفاضلية و التفاضل و التكامل و تتوسع بقى في المتجهات و كدة .. طبعاً حتقولي الكلام دة بيتعمل ببرامج جاهزة زي الماتلاب مثلاً .. بس برضو لازم تبقى فاهم .. و ركز أوي على كلمة فاهم دي .. عشان لو مش فاهم و مجرد واحد بيحل مسائل عمرك ما حتستفيد حاجة .. عشان كدة حكاية تجيب مدرس دي مش حتنفعك في حاجة .. مدرس ثانوية عامة دة بتاع حل مسائل الإمتحانات القديمة .. إنما لو عاوز تفهم بقى .. إقرا بنفسك .. إقرا و إبحث .. ممكن لو في حاجة مش فاهمها إبقى إبعتلي على الإيميل أو على المدونة بتاعتي أو على الرسائل الخاصة .. أنا برضو ليا في الرياضة شوية ..

يا إما بقى الإتجاه التاني .. نظم المعلومات .. دول ناس ملهومش لا في بروسيسور ولا في هاردوير ولا في نظم تشغيل ولا بيعملوا برامج و بيحتاجوا أوي للرياضة .. دة مجرد واحد يروح شركة يقولهم عاوزين إية .. يعملهم برنامج للشركة بحاجة من الحاجات إللي مفهاش لا رياضة ولا محتاجة برمجة كتير ولا أي حاجة .. حاجة زي الأوراكل أو كدة .. بيتعلم بقى شغل السوق و إزاي أحلل طلبات الزبون عشان أعرف البرنامج إللي عاوزة حيبقى شكله إية في الأخر .. ممكن برضو يصمم مواقع .. حاجات كدة .. المهم إنه بيشتغل بحاجات جاهزة .. دة ممكن إللي ينفعه بقى حاجة زي الإحصا و نظرية الفئات و المجموعات عشان ليها علاقة شوية بقواعد البيانات ..

طبعاً أنا أرشحلك النظام الأول .. بالنسبالي أنا الإتجاه دة بتشغل فيه دماغك و بتفكر تفكير رياضي و بتصمم و بتبدع أكتر .. الإتجاه التاني مليان منه في السوق .. حتلاقي بتوع كليات التجارة داخلين في الموضوع و ممكن الشركات تفضلهم عليك بما إنهم دارسين تجارة و عندهم ما يكفي من العلم إنهم يعملوا برامج قواعد بيانات ..

أنا طبعاً لا في دة ولا في دة .. أنا في قسم هندسة حاسب .. بركز أكتر على الهاردوير و الإلكترونيات .. و فيها رياضة برضو ..

سيبك بقى من كل الكلام إللي فوق .. و خدها مني نصيحة .. إوعى تعتمد على أي جامعة مهما كانت أو أي معهد أو أي مدرسة أو أي حاجة في مصر إنها حتعلمك .. نادر جدااااً جداااااً جدااااً إللي حتلاقيه بيعلم صح .. إعتمد على نفسك .. حاول تتعلم بنفسك .. للأسف نظام التعليم في مصر بيخيرك بين حاجتين .. عاوز التفوق و الشهادة و النجاح ولا عاوز تتعلم .. إللي بيركز على إنه يجيب مجموع و ياخد شهادة و ملوش دعوة إللي أخده دة كان بيتكلم عن إيه عمره ما حيتعلم .. و في النهاية بيتعين معيد و تستمر تلك الحلقة المفرغة و تتكرر نفس الدورة بتاعت التعليم الفاشل .. إلا في بعض الإستثناءات القليلة مع الأسف ..

بص ياعم انت عايز تكون مبرمج محترف اول حاجة يكون عندك الدافع والباعث لكدة او تحب المجال ده خالص مش مجرد انك سمعت عنه وخلاص

ثاني حاجة حكاية الجامعة دي عمرها مهتعلمك برمجة صح ففقط ادخل اي كلية ويستحسن يكون لها علاقة بالحاسب وكدة ده لو عايز تبقي من ذوات التعليم العالي زي نظام بلدنا وكدة

ثالث حاجة اتعلم مع نفسك ودورات كتير انت وبتدرس واهتم بالسيرش او البحث الكتير وركز انك تتعلم مع نفسك هتحبها جامد

رابع حاجة وقبل كل ده انوي انك هتكون حاجة في المجال ده

omar_cplusplus كتب:

للأسف نظام التعليم في مصر بيخيرك بين حاجتين .. عاوز التفوق و الشهادة و النجاح ولا عاوز تتعلم .. إللي بيركز على إنه يجيب مجموع و ياخد شهادة و ملوش دعوة إللي أخده دة كان بيتكلم عن إيه عمره ما حيتعلم .. و في النهاية بيتعين معيد و تستمر تلك الحلقة المفرغة و تتكرر نفس الدورة بتاعت التعليم الفاشل .. إلا في بعض الإستثناءات القليلة مع الأسف ..

يعنى نفهم من كده ، ان اللى بينجح بتفوق هو اللى مش بيفهم ومش بيتعلم ، لكن اللى يرسب ويفشل وبالكاد يحصل على درجات النجاح هو ده اللى فهم واتعلم صح؟

غريبه ، معلوماتى القديمه ان اللى بيتعلم كويس ويفهم الماده كويس هو اللى بيعرف يجتاز الإمتحانات بتفوق مهما كانت صعوبتها. لكن اللى بيرسب هو اللى لم يتعلم او يفهم شئ مما درسه , وبالتالى لا يستطيع إجتياز الإختبارت مهما كانت تافهه ، والمنطقى انه هو اللى يرسب او بالكاد ينجح بدرجات الرأفه. وطبيعى بعد كده انه يعلق أسباب فشله على حجج وأوهام ما أنزل الله بها من سلطان.

شكرا انك صححت لى معلوماتى القديمه , كلام قيم يستحق التمعن فيه. وان شاء الله الطلاب تسمع نصيحتك وترسب فى الامتحانات وتتجنب التفوق والنجاح علشان يثبتوا انهم فهموا صح واتعلموا صح. وان شاء الله يوم القيامة هتلاقيهم حولك وهيكونوا فى ميزانك

عماد حمدي احمد كتب:

يعنى نفهم من كده ، ان اللى بينجح بتفوق هو اللى مش بيفهم ومش بيتعلم ، لكن اللى يرسب ويفشل وبالكاد يحصل على درجات النجاح هو ده اللى فهم واتعلم صح؟

غريبه ، معلوماتى القديمه ان اللى بيتعلم كويس ويفهم الماده كويس هو اللى بيعرف يجتاز الإمتحانات بتفوق مهما كانت صعوبتها. لكن اللى بيرسب هو اللى لم يتعلم او يفهم شئ مما درسه , وبالتالى لا يستطيع إجتياز الإختبارت مهما كانت تافهه ، والمنطقى انه هو اللى يرسب او بالكاد ينجح بدرجات الرأفه. وطبيعى بعد كده انه يعلق أسباب فشله على حجج وأوهام ما أنزل الله بها من سلطان.

شكرا انك صححت لى معلوماتى القديمه , كلام قيم يستحق التمعن فيه. وان شاء الله الطلاب تسمع نصيحتك وترسب فى الامتحانات وتتجنب التفوق والنجاح علشان يثبتوا انهم فهموا صح واتعلموا صح. وان شاء الله يوم القيامة هتلاقيهم حولك وهيكونوا فى ميزانك

السقوط مش صعب .. كل الحكاية إنك حتكبر دماغك و تطنش أي حاجة .. لا فهم و لا حتى حفظ .. و حتسقط ..

إللي فاهم مش حيقدر يحفظ .. و الإمتحانات في الغالب بتبقى معتمدة على الحفظ .. إللي حيضيع وقته في إنه يحاول يفهم المنهج كان بيتكلم عن إية و ليه عملنا كدة و معملناش كدة .. في النهاية إللي كبر دماغه من الكلام دة و قعد حفظ المنهج صم و ملوش دعوة بأي حاجة حيبقى أحسن منه ..

مش حقولك حيسقط .. إنما الأوائل في الغالب بيبقى متعلموش حاجة أوي .. حتلاقي في ناس مش من الأوائل .. مش فشلة برضو .. بس هما دول إللي تقدر تقول إنهم إستفادوا و إتعلموا ..

omar_cplusplus كتب:

السقوط مش صعب .. كل الحكاية إنك حتكبر دماغك و تطنش أي حاجة .. لا فهم و لا حتى حفظ .. و حتسقط ..

إللي فاهم مش حيقدر يحفظ .. و الإمتحانات في الغالب بتبقى معتمدة على الحفظ .. إللي حيضيع وقته في إنه يحاول يفهم المنهج كان بيتكلم عن إية و ليه عملنا كدة و معملناش كدة .. في النهاية إللي كبر دماغه من الكلام دة و قعد حفظ المنهج صم و ملوش دعوة بأي حاجة حيبقى أحسن منه ..

مش حقولك حيسقط .. إنما الأوائل في الغالب بيبقى متعلموش حاجة أوي .. حتلاقي في ناس مش من الأوائل .. مش فشلة برضو .. بس هما دول إللي تقدر تقول إنهم إستفادوا و إتعلموا ..

أستطيع أن اتصور انه هناك طالب ما استغل نقطة ضعف فى الإمتحانات - كإعتمادها على الحفظ او غيره - وبالتالى استطاع ان ينجح بمجموع عالى. ولكنى بأى حال من الأحوال لا يمكننى تصور أنه يوجد طالب تعب وذاكر وفهم واتعلم كويس خلال العام الدراسى وفى النهاية لا يستطيع ان يجتاز إمتحان الماده (الإمتحان الذى إجتازه بتفوق طالب أقل منه فى التحصيل الدراسى) فهذا مخالف للمنطق السليم.

وإن كان الطالب الذى فهم واتعلم كويس لم يستطيع إجتياز امتحانات الماده بتفوق ، فكيف يثبت أنه فهم كويس واتعلم كويس؟ كل هذه حجج باطله للكسالى والمقصرين لتبرير ضعفهم وتقصيرهم فى تحصيلهم الدراسى ، وهذه الشماعات موجوده من قديم الأزل وليست جديدة على التعليم أو حتى فى أى مجال أخر.

فقط اريد ان انبهك انك محاسب عن كل كلمه تنطقها , واعلم أن كلامك هذه سيقراه الكثر والكثير من الطلاب ، ولو تأثر أحدهم بنظرياتك الغريبه ومفهومك عن الفهم والنجاح ولم يعد يهتم لا بتفوق دراسى ولا بمنافسه على المراكز الأولى دراسيا ، فستجده يوم القيمه فى موازين أعمالك الغير صالحة. إتق الله وقل خيرا أو أصمت.

هذا والله أعلى وأعلم ،،،

انا مع اخي عمر ..

لكن ليس في جميع الاحوال ينطبق هذا الكلام .. لكن في كثير من المواد الجامعيه تنطبق هذه الحاله وذلك بسبب ضعف التدريس والطاقم المشرف ،،

إذ يكون دكتور المادة نفسه ليس على مستوى أُهل لتدريس مادة ما

فيصبح جل اهتمامه على الكتاب المقرر ويكون الامتحان يحوي بكامله على اسئله نظريه بحته .. وليس على مقياس فهم الطالب للماده

حقا واجهتني هذه المشكله في كثير من المواد ومنها مقرر البرمجة بلغة الجافا

نجحت بها بـ D أي ( مقبول ) لكن ليس لسوء فهمي او ضعفي في البرمجة لكن لان الامتحان كان لا يحوي على اي سؤال يطلب كتابة برنامج أو مخرجات برنامج

فقد كان بكامله يتكلم عن مفاهيم نظرية سخيفة وتعريفات ليس من المهم على المبرمج حفظها اذ كان متمكن من تطبيقها

وهنا يتفوق من يحفظ الكتاب حفظا اعمى على من هو يفهم اساس المادة وقادر على البرمجة باللغه

ولو تسال احدهم عن مفهوم ما ما معناه باللغه العربية لم يجيبك

اذ قام بحفظه بلا اي وعي بماهيته

عماد حمدي احمد كتب:

أستطيع أن اتصور انه هناك طالب ما استغل نقطة ضعف فى الإمتحانات - كإعتمادها على الحفظ او غيره - وبالتالى استطاع ان ينجح بمجموع عالى. ولكنى بأى حال من الأحوال لا يمكننى تصور أنه يوجد طالب تعب وذاكر وفهم واتعلم كويس خلال العام الدراسى وفى النهاية لا يستطيع ان يجتاز إمتحان الماده (الإمتحان الذى إجتازه بتفوق طالب أقل منه فى التحصيل الدراسى) فهذا مخالف للمنطق السليم.

وإن كان الطالب الذى فهم واتعلم كويس لم يستطيع إجتياز امتحانات الماده بتفوق ، فكيف يثبت أنه فهم كويس واتعلم كويس؟ كل هذه حجج باطله للكسالى والمقصرين لتبرير ضعفهم وتقصيرهم فى تحصيلهم الدراسى ، وهذه الشماعات موجوده من قديم الأزل وليست جديدة على التعليم أو حتى فى أى مجال أخر.

فقط اريد ان انبهك انك محاسب عن كل كلمه تنطقها , واعلم أن كلامك هذه سيقراه الكثر والكثير من الطلاب ، ولو تأثر أحدهم بنظرياتك الغريبه ومفهومك عن الفهم والنجاح ولم يعد يهتم لا بتفوق دراسى ولا بمنافسه على المراكز الأولى دراسيا ، فستجده يوم القيمه فى موازين أعمالك الغير صالحة. إتق الله وقل خيرا أو أصمت.

هذا والله أعلى وأعلم ،،،

هو أنا مش بقول إن إللي بيفشل حجته إنه كان عاوز يفهم .. دة أنا بقول للي عاوز يفهم ملكش حجة .. روح إطحن نفسك شغل و علم نفسك و إقرا و دور .. بغض النظر هل إللي حتقراه داخل في المنهج ولا ملغي .. أهم حاجة إنه يتعلم و يطبق و ينفذ .. أنا عن نفسي مثلاً أي مادة باخدها سواء كان فيها عملي ولا مفهاش .. لازم أطبقها و أقرا فيها كويس و أحاول أعرف الحاجات و القوانين دي جابوها منين و كدة رغم إن النجاح في المادة يتطلب فقط إني أحفظ كام دايرة إلكترونية كدة (أحياناً بارقامهم) و أكتب الحل زي ما هو في الإمتحان و خلاص .. بالعكس إللي عاوز يفهم و يتعلم حيبذل مجهود أكتر بكتيييير من إللي عاوز درجات و بس .. الطالب إللي إتعلم و فهم بيحاول يشغل دماغه في الإمتحان و حتلاقيله إجتهادات و طرق حل منطقية حتى لو مكانش حله هو إللي الدكتور منتظره و هو بيصحح .. على عكس إللي حفظ المنهج و دخل كتب كل ما حفظ و جاب درجات .. إللي حفظ حيطلع الأول أكيد ..

أنا مش بقول للناس متذاكروش و إسقطوا عشان النظام وحش .. أنا بقول متعتمدش على نظم التعليم الموجودة حالياً و إطحن نفسك شغل و قرايه و علم نفسك كويس و إفهم و متحفظش .. و متزعلش لو مطلعتش من الأوائل بما إنك شغلت دماغك في الإمتحان و محفظتش ..

و الواحد بيدعي ربنا إني أكون مخلص في النصيحة دي و الناس يعملوا بيها عشان تكون في ميزان حسناتي .. لو الناس عملوا بالكلام دة حيبقى نهضة تعليمية مش دعوة للفشل ولا إعطاء حجة للكسالي .. بالعكس .. إللي جابوا درجات و متعلموش حاجة و حفظوا .. دول هما إللي بيتحججوا حجج باطلة عشان يدافعوا عن عدم فهمهم و عدم تعلمهم لأي حاجة .. و الواقع بيشهد بالكلام دة .. فعلاً في أزمة في التعليم .. أومال تبرر بإية إن جامعاتنا مش واخدة ترتيب عالي على مستوى جامعات العالم ..

إدخل على موقع جامعة الـMIT و شوف مناهجهم في كلية الهندسة (حاطين مناهجهم على النت) و شوف مناهجنا .. شوف المناهج بتاعت أي جامعة أجنبيه من إللي واخدين ترتيب عالي على مستوى العالم و قارنها بمناهجنا .. مناهجنا بتدعوا للحفظ و عدم الفهم .. و إللي بيحاول يجتهد و يتعلم مش حيقدر يحفظ .. و أغلب إمتحاناتنا بتختبرك إنت حافظ ولا مش حافظ .. و على فكرة بقى .. لما بييجي دكتور بيشرح كويس و بيحط إمتحانات تختبر فهمك في الغالب بتلاقي الطلبة الأوائل بيتعبوا فيها و يتعقدوا و المعيد تلاقيه متعاطف معاهم .. و تلاقي الطالب بتاع الفهم هو إللي جاب درجات .. بس للأسف النوع دة من الدكاترة نادرررر جداااااً و في الغالب بينتدب لأي جامعة برة .. يروح لبنان ولا جامعة الملك سعود ولا أي جامعة من الحاجات إللي واخدة ترتيب عالي إللي نادر إنك تلاقيها في العالم العربي أو يروح جامعة في أمريكا أو أوروبا .. هو دة الواقع .. أنا مش بجيب كلام من عندي أنا بحكي الواقع إللي قدامي .. و ياريت الناس تاخد بالكلام دة

خيرا أخى الفاضل

ربنا يتقبل منا ومنكم صالح الأعمال ،،،

تم اغلاق الموضوع لسببين:

1. تمت الاجابة على صاحب التساؤل.

2. خروج الموضوع عن مساره. المنتدى ليس مكان لانتقاد جهات رسميه معينه. اضاءة شمعة خير من لعن الظلام.

بالتوفيق،