السلام عليكم ورحمة الله وبركاته
يمكن دي اول مشاركه ليا في المنتدي الاكثر من رائع ده ، ويمكن انا يشرفني اني اكون احد اعضاء هذا المنتدي وهذا المنتدي من افضل ما راينا ويا رب خلي لنا هذا المنتدي و و و
كلام كتير لازم الواحد يقوله قبل ما يشارك في اي منتدي عربي بتاع اي حاجه ،
المهم ان ده مش تقليل من شان هذا المنتدي ولكن انتقاد لسلوكنا كلنا ك ( عرب )
تسمحولي بانتقاد تاني بس مش علي العرب المره دي ، ولكن علي الاساتذه الكبار اللي بيتطوعوا كل كام شهر ويضيفوا موضوع عن تعليم البرمجه (للمبتدئين ) ، وبعد كام سطر من طمانة هذا (المبتدئ) انه خلاص قرب يعمل برامج ويبقي من الاثرياء ، يبدا الاستاذ الدكتور ويعرض علمه الغزير في صوره بشعه كالتالي :
1 - شوية مصطلحات هو نفسه عرفها بعد كام سنه من بداية تعلمه هو شخصيا ، وبيطلب من ( المبتدئ) - يا اما - ضمنيا انه يكون عارف معناها مسبقا ووده طبعا بانه ما يحاولش حتي يفسرها له
واما - يوصل للمبتدئ الحكايه علي بلاطه ( اسف للفظ ) ويبلغه انه هايبقي يفسرها في وقتها اللي طبعا ما جاش في ولا موضوع من المواضيع دي ،
يعني باختصار : ما تحاولش تعرف البدايه فين
2 - كام مثال علي اي برنامج قواعد بيانات ، ممكن البرنامج ده يتعمل عليه رسايل ماجستير او دكتوراه من مدي تعقيده المرتبط بمدي الاستفاده منه، وللاسف الامثله تخلي الواحد ( المبتدئ ) يا اما يمل من الموضوع ويحاول يشيل الفكره برمتها من تفكيره ، يا اما يطبق المثال ويحفظه صم ويفرح بنفسه اوي وبعدين يلاقي ان المثال ده لا فاده بحاجه ولا عرف هايطبقه امتي ولا ايه موقعه من البرنامج اللي هو عايز يعمله ولا ها يضيفه في البرنامج ازاي وايه اللي هايتعمل بعده او ايه اللي اتعمل عشان يعمل الملف ده اساسا ...................
يعني باختصار برضه : لا عرفت البدايه فين ولا عرفت ترتيب خطوات عمل اي برنامج ( ايه قبل ايه ) او ( ايه علشان ايه )
3 - بعض التحدي والتفاخر والمجاملات وكثير من الصفات البشريه التي لا يمكن ان تسود في البيئه التعليميه ، للاسف موجوده بكثره
يا جماعه الكلام ده مش خاص بمنتدي الفريق العربي للبرمجه ، لانه في مقدمة امثاله من المنتديات العربيه ، ولكنه خاص بمنتديات البرمجه ( العربيه ) للاسف كلها
ويارب حد يلاحظ اني ما جيبتش سيرة مشاكل التحميل والصور وسقوط السيرفرات وخلافه ، يعني انا بتكلم عن محتوي المواضيع وده اللي يهم اي ( مبتدئ)
فيا ريت تعتبروني مبتدئ (مؤقتا) وحد يكتب موضوع عن تعليم البرمجه يتلافي كل ما سبق ، انا واثق ان هناك كثير يستطيع ، ولكن من لا يبخل بعلمه نسبه منهم ، ومن يقدر علي توصيل المعلومه نسبه من النسبه ، ويا ريت ما حدش يفهم القدره علي توصيل المعلومه انها الكلام بالعاميه ، وان كنت باكتب المشاركه دي بالعاميه ولكن لاحظو انها مشاركه غير تعليميه ( حتي الان )
اشكركم