سؤال : حد يفهمنى ما هو قسم نظم المعلومات وما &

السلام عليكم ورحمة الله وبركاته

اخى فى الله والله منذ طرحك للموضوع وانا محتار حيرة شديدة

مش عارف اكتب ايه ولا ايه سؤالك الحقيقة حلو وخصوصا انو فى تخصوصى

لانى حاصل على بكالوريوس فى نظم المعلومات الادارية بس الحقيقة اجابة

سؤالك علشان يبقى الواحد جاوب اجابة شاملة محتاجة صفحات وانا اكتر من مرة

اكتبلك رد وبعدين امسحه واقول انى كدة تقلت علشان كدة هحاول اقلك الامر بأبسط

شكل واكثر اختصارا علشان انت متشتتش وهركز فى اللى يهمك ان شاء الله

نظم المعلومات تعرف على انها مجموعة من الانظمة لها عناصر معينة او مجموعة من الاجزاء

التى تتكون وتتكامل وتتفاعل مع بعضها لتكوين النظام ومن التعريف ده لو ركزت هتعرف اهمية

نظم المعلومات لان مفيش حاجة فى الدنيا غالبا من غير نظام وعناصر مكونة لهذا النظام

علشان كدة نظم المعلومات عنصر هام واساسى فى اى نشاط سواء تجارى او خيرى او

حكومى او خدمى او حتى عسكرى علشان كدة نظم المعلومات مهمة جدا لان من خلال

دراستى لنظم المعلومات عرفت انو دورى هو تصميم نظام لأى منشاءة (سواء كان كله بالحاسب الالى

واى لغة برمجة او الحاسب الالى جزء منه) وايضا تحليل النظام لمعرفة عيوبه وإصلاحها والعمل

على رفع كفاءة النظام بأفضل الطرق الممكنة وخد بالك انا لما بقول كلمة النظام يعنى اى مجال

اواى منشاءة يعنى اى حاجة لها نظام مثل الشركات, المصانع, المستشفيات ,الجمعيات بختلاف

انشطتها,او المصالح الحكومية والوزارات بأنوعها يعنى تقريبا كل مجالات وانشطة الحياة وده دليل

على اهمية نظم المعلومات ودور اخصائى نظم المعلومات بختلاف تخصوصاته سواء محلل او مصمم

او مدير ......ده بختصار شديد وموجز لتعريف نظم المعلومات واهميتها ودورها وان شاء الله هكملك الباقى

الناهردة او بكرة بالكتير ان شاء الله وارجو المعذرة لشدة انشغالى ولكن قلت اكتب اللى اقدر عليه

دلوقتى وارجو المعذرة ايضا على تاخرى ولكن المشكلة انى كنت محتار بجد لانى عندى حاجات كتير

عاوز اقلها واعرفك حاجات كتير بس الحقيقة خايف لمعرفش اشرحلك كويس عموما انا هحاول على

قد ما اقدر ان شاء الله والله الموفق والمستعان والسلام عليكم ورحمة الله وبركاته

السلام عليكم ورحمة الله وبركاته

شكرا كتيير يا بشمهندس على رد حضرتك ونصحتك

علشان بجد انا كنت محتاجة حد يفهمنى ايه قسم نظم المعلومات

علشات انا ان شاء الله ناوية اتخصص فى هذا المجال وكنت عاوزة اعرف ايه اهميته ونشاطه فى مجال العمل

علشان مكنش ندمت على هذا الاختيار

وبطلب من حضرتك توضحلى ازاى ابدا فيه وازاى افهمه

وشكرا وجزاكم الله خيرا

السلام عليكم ورحمة الله وبركاته

الشكر لله اختى فى الله وبارك الله فيكى والف شكر على كلامك الجميل وارجو الله ان اكون عند حسن الظن

ان شاء الله وعلى فكرة مش بشمهندس ولا حاجة انا مستحقش اللقب ده والف شكر على ذوقك وان شاء الله

هفيدك الى اقصى درجة ممكنة بإذن الله لان الردود بتحمس الواحد اكتر لانى لما رديت اول مرة كنت حاطط فى

دماغى ان ممكن اللى طرح الموضوع ميدخلش تانى اساسا ويتابع لكن الحقيقة التجاوب بيحمس اكتر ويخلى

الواحد يجتهد ويسعى اكتر ولو ناوية تتخصصى فى هذا المجال يايرت تدينى فكرة انت اساسا دارسة ايه او بتدرسى

ايه انا لاحظت طبعا ان حضرتك قلتى انك بتاملى انك متندميش على اختيارك والى فهمته من العبارة دى انك خدتى قرار

فعلا وغالبا بدائتى فى دراسة نظم المعلومات على ما اعتقد عموما ارجو توضيح هذه النقطة علشان اعرف افيدك اكتر

علشان الكلام للدارس او اللى فى بداية الدراسة غير اللى مدرسش خالص وعاوز يعرف كل حاجة عموما انا زى ماوعدت

المرة اللى فاتت انى اكمل باقى الرد وهرد الناهردة على السطر الثانى

(وكيف ان يكون الانسان كويس فى هذا المجال وان يستفيد منه الاستفادة القصوى)

يكون كويس فى هذا المجال والافضل من درس طبعا شعبة نظم معلومات او ما يسمى احيانا بالحاسب الالى ولازم ناخد

بالنا ان مايسمى فى مصر شعبة حاسب الى هى المراد بها شعبة نظم المعلومات الادارية وفيه فرق بينهم وبين شعبة علوم الحاسب او حاسبات ومعلومات علشان تاخدو بالكم وعلى فكرة خريج نظم معلومات ادارية عندو افضليه عن خريج علوم الحاسب او حاسبات ومعلومات وده مش كلامى ده كلام دكتور كان بيدرسلى فى نظم المعلومات وكان فى نفس الوقت بيدرس فى كلية حاسبات ومعلومات وقال ان احنا(خريجى او دارسى نظم المعلومات الادارية) عندهم افضلية ومميزات عن خريجى او دارسى الحاسبات والمعلومات وده لان طالب الحاسبات والمعلومات او علوم الحاسب بيكون تركيزه على البرمجيات واحترافها اكثر وعندما يخرج الى الحياة العملية يصطدم بواقع عدم معرفته بالحسابات والادارة ونظم المعلومات والعديد من الامور التى يجب ان يكون عنده فكرة عنها حتى يستطيع عمل البرامج المناسبة لجميع الفئات واولها الشركات فكيف مثلا سيقوم بعمل برنامج محاسبى لشركة وهو معندهوش اى فكرة عن المحاسبة او الادارة والمخازن وما الى ذلك من الامور التى يتوجب ولو اخذ فكرة عنها فى حين ان طالب النظم يقوم بأخذ فكرة عن كل انواع المحاسبة والادارة سواء ادارة عامة او ادارة انتاج او ادارة مخازن وايضا

يقوم بالتعرف على الرياضيات عامتا ورياضة البنوك خاصتا والاقتصاد ونظم المعلومات المحاسبية والاحصاء وطبعا البرمجة وقواعد البيانات واخبرنا الدكتور ايضا انه يتم التفكير فعلا فى ادخال بعض هذه المواد لدارسى الحاسبات والمعلومات

وكل هذه الاشياء تجعل اخصائى نظم المعلومات اكثر دراية ومعرفة ولكن يجب عليه ان ينمى مهاراته لان ما يقوم بدراسته هى القاعدة الاساسية التى يقوم بالبناء عليها ومن هنا تاتى الاجابة على سؤال كيف يكون كويس فى هذا المجال ويصل للاستفادة القصوى بالنسبة للدارس يجب طبعا ان يهتم بدراسته جيدا ويعرف اهمية المواد التى يقوم بدراستها وكيف ستخدمه فى ان يكون اخصانى نظم معلومات متميز وقوى فبعد معرفة الجوانب المتعددة والضرورية والتى ذكرت منها ماسبق ذكره فيجب عليه ان يقوى نفسه بإحترافى فى ثلاث اتجاهات(وطبعا ممكن يركز فى اتجاه واحد بس الافضل الثلاثة علشان يبقى متميز وقوى بجد) الاتجاه الاول والذى يجب البداية به هو الاكسيس وذلك لان الاكسيس يمكنه من الميكنة الجزئية لاى نظام

(يعنى ايه ميكنة جزئية؟) الميكنة الجزئية هى ان تقوم بعمل برنامج مخصص لاحد اجزاء النظام يعنى مثلا تعمل برنامج شئون العاملين لقسم شئون العاملين بالمنشاءة او عمل برنامج للمخازن او الشئون المالية والحسابات ده اسمه ميكنة جزئية لان مفيش ترابط كامل بين جميع اجزاء النظام بالحاسب الالى وهذا ما يسمى الميكنة الشاملة او الكاملة للنظام وهذه النقطة التى تنقلنا للاتجاه الثانى والثالث الا وهو احتراف الشبكات واحتراف الاوراكل او sql server يعنى يختار واحد منهم مش الاتنين ويحترفه لان مع احد هذه اللغتين بالاضافة الى الشبكات ستجعله ذو قدرة كبير على ميكنة اى مجال فممكن تميكن وزارة بحالها على مستوى الدولة كلها بجميع فروعها او شكرة عاليمة منتشرة على مستوى العالم وطبعا الميكنة انك تعمل نظام كامل

متكامل للمنشاء مهما كان توسعها سواء كانت فى مبنى واحد او على مستوى العالم كله وزى مقلت فى المشاركة اللى فاتت ان مش شرط يكون الحاسب الالى طبعا داخل كل اجزاء النظام بس ده بيرجع الى اسباب كتير احيانا ترجع الى المنشاءة واحيانا ترجع الى اخصائى النظم ما يهمنا هنا اخصائى النظم فاخصائى النظم يجب ان يقوم بعمل تصميم للنظام بشكل مثالى حتى يصل بالمنشاءة الى افضل اداء ويجعل من النظام نظام كفء وفعال لذلك اخصائى النظم كفائته مش منحصرة فى كفائته البرمجية بل يجب عليه ان يكون فعلا ملم باشياء عديدة مثل التى ذكرتها سابقا لان البرمجيات صحيح هتخدمه فى انو ممكن يعمل النظام كله مميكن بالحاسب الالى بس فى منشاءت مستحيل الحاسب الالى يدخل فى جميع اجزائه ومراحله ومن هنا تبرز كفائة اخصائى النظم وقدرته على التصميم فى جعل النظام متناسق ومتكامل سواء كان كله بالحاسب او معظمه او جزء منه فمثلا

لو طلب منك عمل او تصميم نظام لاى منشاء غالبا المنشاءت يكون بها مخازن والمخازن قبل دخول الاغراض الخاصة بالمنشاء لتخزينها بها يجب ان تقوم لجنة او جهة او حتى فرد بفحص الاغراض التى تم استلامها من المورد الذى قام بتوريد الاغراض للتاكد من مطابقتها للمتفق عليه او مطابقتها للمواصفات قبل دخول الاغراض المخازن فهذا يعتبر اجراء ومرحلة من مراحل النظام البسيطة ولكن غالبا يجب وجودها وهذا اجراء موجود فى المصالح الحكومية او الشركات والمنشاءات الكبيرة او حتى المتوسطة او احيانا الصغيرة ايضا فهذا الاجراء مثلا سيكون دور الحاسب الالى فيه هو تسجيل اذا كان الاغراض تم دخولها المخزن مما يعنى مطابقتها وتسجيل كل البيانات الخاصة بالاغراض لكن مش هايقدر الحاسب الالى انو يقابل المورد ويفحص لوحده الاغراض

ويشوف اذا كانت مطابقة ولا لأ حتى لو كان فى اغراض مطلوب فحصها بأجهزة للتاكد من سلامتها فالجهاز وسيلة وايضا يستحيل استخدامه فى فحص كل شىء فلما يصمم اخصائى النظم نظام ويغفل هذا الاجراء الهام او هذه المرحلة فطبعا غالبا تبقى كارثة بالنسبة للمنشاءة ومفيش حد هيقبل نظام مفهوش المرحلة دى اساسا لان كدة النظام يعتبر ناقص وميقدرش يشتغل بكفاءة لان ثغرة بسيطة زى دى يعنى مثلا تاجى الاغراض من المورد وتدخل على المخازن على طول من غير التاكد منها ومن سلامتها ومن مطابقتها للمواصفات او المتفق عليه سعتها المنشاءة كلها ممكن تخسر وتدمر كلها وده طبعا مثال بسيط لإجراء او مرحلة واحدة من مراحل النظام والامثلة كثيرة والمراحل والاجراءات التى يجب توجدها فى اى منشاءة بدون دخول

الحاسب الالى فيها كثيرة وعديدة جدا والنقطة اللى بشرح فيها دى والمثال الذى قمت بطرحه يبين الفرق بين المبرمج واخصائى النظام فالمبرمج يقوم بتصميم برنامج حسب ما يطلب منه ملهوش دعوة البيانات اللى هاتدخل على البرنامج جاية

من فين ولا البيانات اللى هتخرج من البرنامج سواء كانت فى شكل ورقى او رقمى هتروح فين ده مش شغله ولا تخصصه هو دوره ينحصر فى عمل برنامج على الحاسب الالى يكون جزء من نظام كامل يتم ادخال البيانات اليه بشكل معين واخراجها منها بشكل معين لكن غالبا اى جزء او مرحلة خارج الحاسب الالى ملهوش دعوة بيها لكن اخصائى النظم او اللى بيصمم النظام لازم يبقى عارف كل حاجة جاية منين وازاى ورايحة فين وازى بردو ولازم كله يبقى بشكل متناسق ومتكامل مع بعضه مفيش حاجة شازة او مختلفة سواء كان هايصمم نظام كامل او جزء منه او هايعدل على نظام قائم فعلا .

وكفاية كدة بقة الناهردة وارجو ان المسامحة فى اطالتى هذه المرة ولكن ارجو ان اكون قد قدمت ما يفيد باى شكل وارجو المعذرة ايضا إذا كان اسلوبى به اى شىء فانا الحقيقة حاولت على قد ما اقدر اشرح الامر وابسطه فى نفس الوقت وكنت عاوز انفع وافيد الى اقصى درجة ولو حد عاز اى حاجة فإن شاء الله مش هاتاخر عنو ولو فى اى توضيح لاى شىء او اى حاجة فانا مستعد وربنا يقدرنى على خدمة الجميع بإذن الله وعلى فكرة فيه حاجة مهمة عاوز اقولها طبعا فى الكلام اللى فات حاجات مبينة على وجهة نظرى اللى بنيتها من خلال تجربتى ودراستى وما مررت به فعلا فى الحياة العملية فمن الممكن طبعا من يختلف معى فلكل انسان وجهة نظر وراى ولكن طبعا الاختلاف فى الراى لا يفسد للود قضية واذا كان هناك اى ملحوظة او تعليق او معلومة او اى شىء يفيد فأرجو من الجميع الا تبخلو على اخوكم بالنصيحة .

وختاما ان وجد خير وتوفيق فمن فضل الله عز وجل وان وجد خطاء او سهو فمنى والشيطان ونسال الله العفو العافية فى الدنيا والاخرة وان يعلمنا ما ينفعنا وينفعنا بما علمنا والحمد لله والصلاة والسلام على رسول الله (صلى الله عليه وسلم)

والسلام عليكم ورحمة الله وبركاته

السلام عليكم ورحمة الله وبركاته

شكرا يا اخى على هذا الرد

انا الحمد لله درست فى الكلية (حاسبات ومعلومات ) درست قواعد البيانات الجزء الاول منها

وهو تجميع البيانات عن المشروع سواء كان مستشفى صيدلية .............

ورسم الERD لها وعمل علاقات بين الجداول واشتغلت sql server بس مش كله درست اوامر (select,insert,update,delete ) وكمان (DDL) بس مش كلها

ولسه الجزء الكبير فى قواعد البيانات ان شاء الله هيكون فى سنة ثالثة

بس انا الحمد لله عجبنى الموضوع ونفسى ربنا يوفقنى فيه واكون بجد حاجة كويسة ونفسى افهمه بجد

وشكرا كتيييير على اهتمام حضرتك وجزاك الله خيرا

بس حضرتك قلت ان فى فرق بين اللى درس نظم معلومات ادارية وخريج حاسبات ومعلومات؟؟؟؟؟؟

ازاى هيكون الفرق اذا كان فبه قسم فى كلية حاسبات ومعلومات اسمه نظم المعلومات

السلام عليكم ورحمة الله وبركاته

الشكر لله أختى الكريمة وبارك الله فيكى ورينا يوفقك ان شاء الله

وبدايتا طبعا الكريمة اشكرك على سؤالك الذى جعلنى بحثت اكثر

فى الامر وجعلنى استفدت معلومات لم اكن اعلمها وشرح لك الان

نتيجة ما توصلت اليه بشكل تفصيلى ان شاء الله هافيدك وويضحلك الصورة اكثر

بديتا انا الحقيقة بنيت معلوماتى على راى الدكتور اللى درسلى قبل كدة

وكان بيدرس فى نفس الوقت فى كلية حاسبات ومعلومات وحرصت

فى المشاركة السابقة على توضيح هذه النقطة وكمان حرصت على

توضيح انو قال ان هم بيفكرو فى التغير والتعديل علشان لو كان حصل

فعلا (وده كان بالنسبالى احتمال ضعيف) بس بردو ذكرته علشان لو كان حصل فعلا

وطبعا الدكتور ملهوش اى مصلحة فى انو يدينا معلومات مغلوطة علشان

كدة بعد محضرتك رديتى عليا وقلتيلى ان فيه قسم نظم معلومات فى كلية

حاسبات ومعلومات وانا الحقيقة مكنتش اعرف قبل كدة ان فى اقسام

فى كلية حاسبات ومعلومات اساسا او يمكن كنت عارف ونسيت الحقيقة المهم انى بحثت فى الامر

وزرت موقع كلية الحاسبات والمعلومات جامعة القاهرة علشان استوضح الامر

اكثر ووجدت فعلا ان فى اختلاف واضح اولا اقسام الكلية هى (علوم الحاسب)

و(تكنولوجيا المعلومات)و(بحوث عمليات)و(نظم معلومات) وطبعا كما تعلمين

التخصص يكون من السنة الثالثة وسنة اولى وثانية هما قسم عام للجميع

(انا بس حبيت اوضح علشان لو حد تانى قراء الموضوع) المهم بالنسبة

للاقسام (علوم الحاسب)و(تكنولوجيا المعلومات)و(بحوث عمليات) طبعا

واضح من اسمائهم ان دول بعاد عن نظم المعلومات وبالتالى مختلفين

نأتى للقسم الرابع والذى فيه تشابه الا وهو نظم المعلومات وفيه اختلاف

جزئى فعلا بين الاثنين فلقد اتطلعت على المواد الدراسية للكلية عامتا وخاصتا

قسم نظم المعلومات ووجدت اختلاف وتشابه التشابه موجود فيما يختص بمواد

التخصص الا وهى مواد نظم المعلومات ولكن فى كلية الحاسبات بتوسع وتعمق

اكثر فيما يختص بنظم المعلومات ولكن الاختلاف موجود فى انه لا يوجد اى مواد

تجارية او محاسبية او ادارية مثل التى ذكرتها سابقا وهنا يكمن الاختلاف ولهذا

السبب قال الدكتور بأنهم يفكرو فى كلية الحاسبات بإدخال بعض هذه المواد

لان بعض الطلبة بيضطرو بعد التخرج لاخذ دورات فى المحاسبة والادارة علشان

يتميزو اكثر فى مجالهم بس على فكرة الاختلاف اكبر من مجرد اختلاف فى مواد

لان الاختلاف بردوا على ما اعتقد فى المؤهل نفسو لأن فى إختلاف بين

بكالويوس نظم معلومات وبكالوريوس نظم معلومات إدارية ودى حضرتك ممكن

تخدمينا فيها إنك تسالى عندك فى الكلية شهادة البكالوريوس مكتوب فيها ايه

بالظبط لان غالبا هتلاقى بكالوريوس فى نظم المعلومات فقط وهذا هو المؤهل

الذى تقوم بإعطائه كلية الحاسبات والمعلومات اما بالنسبة لبكالوريوس

نظم المعلومات الادارية(اللى حاصل انا عليه) فهو تابع لكليات التجارة لان شعبة نظم المعلومات الادارية

شعبة من شعب كليات التجارة اساسا ولكن غير منتشرة فى الكليات الحكومية ولكن

تجديها منتتشرة بوضوح فى المعاهد الخاصة لان هناك تقريبا اكثر من 15 او 20

معهد حاسب الى (نظم معلومات ادارية)فى مصر لان زى مقلت قبل كدة شعبة الحاسب الالى

بيكون مقصود بيها نظم المعلومات الادارية .

كدة اعتقد اتضحت الصورة اكثر من جميع الجوانب ولتاكيد التوضيح هذا رابط لصفحة المواد

الدراسية الموجودة بكلية الحاسبات المعلومات جامعة القاهرة:

http://www.fci-cu.edu.eg/?pg=academic/coursecatalog.php&query=EXPAND

وده بردو رابط الصفحة الرئيسية للكلية لزيادة المعلومات لان الحقيقة الموقع نفسه مفيد

http://www.fci.cu.edu.eg/index.php?lng=ar&

وبعد اختى الكريمة فقسم نظم المعلومات الموجود بكلية الحاسبات يركز على مجال وعلم

نظم المعلومات بتعمق وتوضيح اكثر يعنى اقصد يقومون بدارسة نظم المعلومات بشكل بحت

دون الارتباط باى شىء اخر او اى منظور اخر فى حين ان قسم نظم المعلومات الادارية يقوم بدراسة

نظم المعلومات ولكن من منظور اخر وطبعا مش بيتعمق فى علم نظم المعلومات البحت زى اللى

موجود فى كلية الحاسبات بس بيختلف فى انو بيدرس نظم المعلومات لكن من منظور معين

علشان كدة بيدرس مع نظم المعلومات مواد ادارية ومحاسبية واقتصادية بشكل يتكامل مع نظم المعلومات .

ده اعتقادى ووجهة نظرى للموضوع والله اعلى واعلم وياريت حضرتك تاكدي لنا معلومة اسم المؤهل

عند حضرتك زى منا قلت ولا فيه اختلاف لان ده تخمين من عندى فاريت تأكديلى صحتو من عدموا

وأرجو ان اكون وضحتلك الامر بالشكل اللى يرضيكى بس طبعا برغم الاختلاف بين القسمين وان كان مش كبير

لكن بردو اعتقد من وجهة نظرى انو مش متعارض مع اللى قلته عن نظم المعلومات فى المشاركة السابقة

بل على العكس اعتقد ان هى فادت فى انك بجوار دراستك فى نظم المعلومات تعملى ايه علشان حضرتك

او اى حد زيك عاوز يبقى متميزة اكثر فى هذا المجال عند خروجه للحياة العملية ولا ايه رايك؟

نرجو الافادة والنقاش منكى ومن الجميع حتى نستفيد ونتعلم جميعا لان بجد النقاش وتبادل الاراء مفيد يا اخوانى

لدرجة كبيرة جدا لمن يريد التعلم علشان كدة لو مصححناش اخطاء بعض مش هنتعلم علشان كدة ياريت

اى حد مش شرط الاخت صاحبة الموضوع عندو راى او معلومة او حاجة غلط شفها فى كلامنا ياريت يفيدنا

ويوجهنا ولا ايه رايك يا اختى الكريمة ؟

علشان كلنا ان شاء الله نتعلم ونستفيد ونسال الله العظيم رب العرش العظيم ان يعلمنا ما ينفعنا وان ينفعنا بما علمنا

والسلام عليكم ورحمة الله وبركاته