السلام عليكم :

انا اقترحت فكره المشروع من زمان والتجاوب كان ضعيف وبعد كده معرفتش ادخل كتير....المهم انا نويت -والنيه لله- انى ابداء فى الدوره ديه ,
راجيا من الله ان تكون سبب ان يرحمنى يوم الدين ..


وياريت اى حد يريد المساعده باى شى مهما كان قليل لا يتاخر...

نظام الدوره :
...........

1- الدروس ستنشر يومين فى الاسبوع - السبت والاربعاء

2- سيخصص موضوع للاسئله لكل درس

3- فى نهايه الدوره ستجمع فى كتاب ليكون مرجع للجميع ان شاء الله


ملاحظه : يمكنك طلب المواضيع التى تريد تضمنيها فى الدوره بطلبها فى الموضوع الاصلى للمشروع فى توقيعى..

ملاحظه:

المقدمه من مشروع تخرج الاخ العزيز Genuise-It بتصرف


مقدمة عن البرمجــة:

يقوم الحاسب الآلي عند أداء أي عمل من أعماله بتتبع مجموعة من التعليمات المتسلسلة والمترابطة التي تسمى البرنامج، ويسمى من يكتب هذه التعليمات بالمبرمج، ويعتمد تركيب الجمل والتعليمات على لغة البرمجة المستخدمة، ويتصل الإنسان بالحاسب لتوجيهه للقيام بالأعمال التي يريدها بواسطة لغات البرمجة .

>>
معنى كلمه برمجه هيا تسجيل عدة تصرفات معينه بلغة يفهمها الكومبيوتر ليفعلها عند احداث معينه.
يعنى ايه: اكيد كلنا لعبنا على الكومبيوتر , واكيد انك لحظت مثل ا انك عندما تضغط على سهم يمين يتحرك اللى يتلعب بيه يمين مش شمال..وده معناه ان اللعبه متبرمجه بحيث لو ضربت حضرتك على سهم يمين حتمشى يمين.

وطبعاا مش ممكن ان نسجل هذه التصرفات والاحداث على برنامج وورد..ولا يمكن ان نكتبه بلغتنا العاديه برضه..علشان كده ظهرت لغات البرمجه.


لغات البرمجه :
واللغات ديه كتيره وبتختلف عن بعض فى امكانياتها وسهوله التعامل معاها ..وطبعاا طرق البرمجه والاكواد مختلفه فى طريقه كتابتها , ولكن فكر المبرمج واحد و لو استطعت الوصول لفكر المبرمج تستطيع التعامل مع اى لغه بمجرد التعرف على ادواتها...


1 - لغة الآلة :
وتسمى "اللغة الثنائية " حيث إنها تتكون من سلسلة من 0 و 1، وهي اللغة الوحيد التي يفهمها الحاسب الآلي، حيث تحول جميع اللغات إلى لغة الآلة، حتى تتمكن معدات الحاسب الآلي من التفاهم معها، ولأنها تتكون من صفر وواحد، لذا فقد تميزت هذه اللغة بالصعوبة نظراً لما تتطلبه من حفظ ودقة في كتابة سلسلة طويلة من صفر وواحد بترتيب معين، مما ينتج عنه أخطاء كثيرة من الترميز، ويجب أن يحدد المبرمج كل شي، فكل خطوة يجب أن ينفذها البرنامج يجب أن ترمز، لذا فالمبرمج يجب أن يكون على علم بتركيب الحاسب الداخلي، والعنا وين الرقمية لمواقع التخزين، سواء للبيانات أو التعليمات، كما أن لكل جهاز لغة آلة تختلف عن الجهاز الآخر بحسب النوع والتركيب مما يعني أنه يجب كتابة البرنامج بشكل كامل مره أخرى عن الرغبة في تنفيذه على جهاز آخر، ونتيجة لهذه الصعوبات,

فقد ظهرت طرق أخرى لتمثيل الترميز الثنائي، كالنظام الثماني OCTAL والستة عشري HEX-ADECIMAL بدلا من 1، 0 فالنظام الستة عشر يتكون من ستة عشر رمزاُ هي : 0 ,1 ,2 ,3 ,4 ,5 ,6 ,7 ,8 ,9 A.B,C,D,E,F .
مما يساعد على سهولة قراءة التعليمات المكتوبة وحفظها بهذه اللغة، فبدلا من كتابة 16 رقماً في سلسلة يمكن الاستعاضة عنها بأربعة رموز من رموز النظام التشغيل الستة عشري.


2- لغة التجميع:
ظهرت لغة التجميع بوصفها أو لغة ترميز، تستخدم الرموز SYMBOLIC CODE للتعبير عن تعليمات لغة الآلة، وذلك لمواجهة صعوبة الترميز بلغة الآلة، ولغة التجميع لغة قريبة من لغة الآلة التي يفهمها الحاسب الآلي، وتسمى هذه اللغات بلغات المستوى البسيط.
ويتم استعمال مختصرات ورموز يسهل حفظها وكتابتها لكل تعليمة من تعليمات لغة الآلة، ولغة التجميع كما في لغة الآلة مصممة للعمل على حاسب معين، مما يوفر قدرة أكبر على استغلال موارد الحاسب الآلي ووحدة المعالجة المركزية بشكل أفضل، ويقوم البرنامج المسمى المجمع ASSEMBLER بترجمة البرنامج المكتوب بلغة المجمع إلى لغة الآلة .



3 ـ اللغات العليا:
سميت بهذا الاسم لأنه أصبح بإمكان المبرمج كتابة البرنامج دون معرفة تفاصيل كيفية قيام الحاسب بهذه العمليات، كمواقع التخزين وتفاصيل الجهاز الدقيقة، وتعبيرات لغات المستوى العالي هي تعبيرات شبيهة إلى درجة كبيرة باللغة الطبيعية التي يستخدمها الإنسان في حياته للتواصل، والتخاطب مع الآخرين.

ومن مميزات اللغات العليا التي تميزها من لغات المستوى البسيط، بالإضافة إلى ما سبق، أن هذه اللغات غير مرتبطة بجهاز معين . أي يمكننا تنفيذ البرنامج المكتوب بلغة من لغات المستوى العالي، كالفورتران أو الكوبول أو البيسك على أكثر من جهاز، كما يمكن استخدام أكثر من لغة ترجمة على حاسب معين . كذلك، فإن اكتشاف الأخطاء وتصحيحها أصبح أكثر سهولة بسبب سهولة قراءة البرامج وتتبعها وفهمها .

>>
واحب اقول ملحوظه انه مش كويس زى ما كتير فاكرين انك تقول انا مبرمج فيجول بيزيك او مبرمج سي..ولكن الافضل ان تكون مبرمج تستطيع التعامل مع افضل امكانيات كل لغه .لان مفيش لغه كامله فمثلاا..لغه الفيجول بيزيك تعتبر افضل لغه تصمم فورمات..وعند تصميم قواعد بيانات تختار نوع القاعده حسب طبيعه الاستخدام فلو كان مساحتها صغيره تستعمل Access ولو كانت كبيره تستعمل Oracle وساعتها مش حتقول للعميل اصل انا متخصص Access ! ! .

خطوات تصميم اى برنامج:

1- فكره البرنامج:

لازم يكون عندك فكره للبرنامج اللى حتعمله مثلا , معادله لتحويل تاريخ ميلادى لهجرى, فكره لعبه...

2- تحديد متطلبات البرنامج:

وهنا بتحدد احتياجات البرنامج من ( ادوات التحكم المختلفه , قاعده بيانات , اداه خارجيه لاضافه وظائف معينه..)

3- تصميم واجهة البرنامج:

وديه من اهم عوامل جذب المستخدم, وهنا بتصمم شكل البرنامج , توزيع ادوات التحكم ومكونات البرنامج والالوان اللى حنستخدمها والخطوط المختلفه .


4- كتابه كود البرنامج:

وبنكتب هنا برمجه البرنامج وتصرف ادوات التحكم مع الاحداث المختلفه , وهنا بتظهر مدى براعه المبرمج وقدرته على برمجه برنامج سهل الاستخدام ويؤدى الغرض باقل عدد ممكن من الاوامر و بالتالى اقل مساحه

5- ا ختبار البرنامج:

تجرب البرنامج ....يعنى تشغله بنواتج او حاجات انتا عارف نتائجها بدقه..وتشوف رد فعل البرنامج...او تعمل زى الشركات الكبيره وتنزل نسخه بيتا وتشوف ملاحظات الناس عليها. وياريت تخلى بالك من حاجه .. ان المستخدم مش شرط خبير يعنى يجب ان تضع فى بالك استخدامات غير منطقيه..وتضع التصرف المناسب لها حتى لايتوقف البرنامج..
مثال : لو انتا مثلا مصمم الة حاسبه وقام المستخدم بعمليه غير منطقيه مثل القسمه على الصفر فسيتوقف البرنامج..


تعريفات هامه


1-ادوات التحكم Controls : وهى الادوات الى احنا بنستخدمها علشان نصمم واجهة التعامل مع المستخدم , ودى بستخدمها فى تصميم الفورم فى حاله الفيجول بيزيك... وهى مثل ( ازرار الاوامر , قوائم الاختيارات , صناديق ادخال البيانات , ادوات الربط مع قواعد البيانات ..)


2- الحدثEvents :
وهى الحاجات من تصرفات او افعال اللى حيعملها المستخدم عند تعامله مع البرنامج مثل ( ضغط المستخدم على زر معين فى لوحه المفاتيح , تحريك مؤشر الفاره , الضغط على اداه تحكم فى البرنامج ..)


3-الخصائص : Properties
وهى مميزات وخصائص كل اداه تحكم وهيا اللى بتخلينا نعدل من خصائصها حتى يمكننا التعامل معاها وتكيفها لتلائم برامجنا مثل ( سمك اطارها , لون الخط فيها , لون خلفيتها , شكل مؤشر الماوس لما يمر عليها ...)



Design time
وقت التصميم: .وهو فتره تصميمك للبرنامج, يعنى وانتا بتضيف العناصر وادوات التحكم للبرنامج بتاعك , وبتحدد خواص كل اداه وتبرمج الاحداث المختلفه وردود البرانمج المناسبه عليها.


Run Time
وقت التشغيل: وهو وقت تنفيذ البرنامج, اى وقت تفاعل البرنامج مع المستخدم . ومش ممكن تغيير اى خواص او امر تم كتابتها اثناء البرمجه.

up

السلام عليكم ورحمة الله وبركاته
جزاك الله كل خير اخ فيمتو وجعله في ميزان حسناتك
وبالطبع مثل هذه المواضيع مفيدة جدا للمبتدئين
شكرا جزيلا
===========
الى اللقاء

ما شاء الله , موضوع جميل جدا,,,
بارك الله فيك اخى العزيز FemTo
سيتم تثبيت الموضوع باذن الله تعالى,,,

تشغيل البرنامج




زى ما انتا شايف فى الصوره بنفتح الفيجول استوديو ومنها بنختار الفيجول بيزيك.




وهنا ظهرت الشاشه الافتتاحيه للفيجول وهيا فيها انواع المشاريع اللى ممكن ينفذها الفيجول بيزيك واحنا حنختار ال Standard EXE .( وزى ما انتا شايف برنامج الفيجول يمكنه تصميم الكثير من الاشياء مكتبات ال DLL وادوات ا ل ActiveX والكثير ..وسنتعرض لمعظمها باذن الله..)




ويتكون برنامج الفيجول بيزيك من اربع اجزاء اساسيه :


1- نافذه المشروع:
وديه بيظهر فيها المكونات الاساسيه للمشروع بتاعنا من (فورمات او موديلات...)
2- نافذه النموذج:
وديه النافذه الاصليه او واجهة المشروع بتاعنا واللى غالبا بتكون ظاهره للمستخدم.
3- نافذه الخصائص :
وديه اللى فيها خصائص ادوات التحكم او الفورمات . و بمجرد ما تضرب كليك واحده على اى اداه التحكم تظهر خواصها فى نافذه الخصائص.
4- صندوق الادوات :
وده اللى فيه ادوات التحكم اللى بنستخدمها وبندرجها فى البرامج ( كالازرار ).


ملاحظه:

لو فى اى حاجه من الحاجات اللى فاتت مش ظاهره عندك يمكنك اظهارها...

ادوات التحكم

واحنا عرفنا ازاى نجيبهم , واحنا اتفقنا انه البرنامج عباره عن عده ادوات تحكم مبرمجه ومرتبه بترتيب معين على الفورم..

Text Box
............

وديه ياسيدى بيظهر فيها كتابه وممكن يكتب فيها المستخدم لورغبنا ان يكتب حاجه....يعنى ممكن نضيفلها النصوص فى وقت التشغيل من قبل المستخدم.

Label
........

ليبل معانها عنوان.....وديه ممكن نكتب فيها اى كلام يتعرض للمستخدم بس هو يشوف بس مش ممكن يكتب حاجه(يعنى غير التكست) وذالك اثناء تشغيل البرنامج ولكن هذا لايمنع وجود كود يغير العنوان ولكن كلامنا عن التعامل المباشر بين المستخدم والاداه .

Check Box
………….

صندوق الاختيار واكيد انك شوفته كتير وهوه ليه حالتين مختار او غير مختار (تم اختياره او لا) وممكن يكون اكثر من صندوق اختيار ونختار اكثر من واحد منهم.


Radio Option
……………………..

وده زى صندوق الاختيار بس يختلف عنه انه لو فى اكتر من واحد منه واحد بس اللى يمكن اختياره...

Command Bottom
.......................

وده يا سيدى الزرار اللى انا بقولك عليه من الصبح.....وده بقه لما بتعمل عليه كليك بيدخل لجوه (اه والله) وينفذ الكود اللى متخزن فيه..


List Box
………..

وده بيطلع ليسته فيها حاجات احنا حاطينها والمستخدم يختار منها.. بس مينفعش يكتب اى حاجه.....

Combo Box
…………..

وده عامل زى الليست + التيكست بوكس......بنختار من ليسته وتطلع اللى احنا اخترناه فى بوكس بتاعه وممكن نكتب فيه.

Timer
……..

وده بيسموه المؤقت....وبيكرر الخطوات اللى مكتوبه فيه فى ماده زمنيه بنحددها من خاصيه (الانترفال) ...لو كتبنا 1 مثلا فيكررها كا واحد من الالف من الثانيه...وده مش بيظهر فى وقت التنفيذ.(ولو اردنا ان ينفذ الكود كل ثانيه سنجعل قيمتها =1000)

Shape
…….

وده بقه بيرسم شكل دائره , مستطيل , مربع وكذا شكل هندسى..ولو انتا ختارته وحاولت تجربه.حيرسم غالبا شكل مستطيل ولو انتا عايز تشوف الاشكال التانيه بتاعو , بص فى الخواص بتاعته (بعد ما تعمل كليك عليه) حتلاقى حاجه اسمها shape ومنها ممكن تغير شكله الهندسى .

Line
……

وده بيرسم خط مستقيم....وممكن برضه نعمله اكواد تتنفذ حسب تصرفات المستخدم..

Picture Box
……………

وده ممكن نعرض فيه الصور بمعظم الامتدادت وبيعرضها فى اطار

وهنا مفيش اى تعامل بين المستخدم والصوره.


Image Box
…………..

هنا بقه مش بيعمل اى اطارات بيعرض الصوره...

وممكن نعمل اكواد للصوره ونتعمل معاها زى الزراير بالظبط.


Frame
…………..

وده اطار بنعمله ونضع بداخله الادوات , وبيعطيك ميزه كبيره انك مثلا لو عاوز تخفى ادوات معينه اثناء اى وقت
فتضعهم فى frame واحده وتتعامل معهم ككائن واحد , وايضا يساهم فى تنسيق الادوات على الفورم .

DataControl
…………..

وهيا اداه ربط ادوات التحكم بتاعتنا بقواعد البيانات وسيرد شرحها مفصلا ان شاء الله..


Drive & Dir &File List Box
…………..


وهيا ادوات التعامل مع الاقراص والمجلدات والملفات على الترتيب..وسيتم شرحها بالتفصيل


فى الغالب ليست الادوات الوحيده المستخدمه فى برامجنا بل يمكنك فيما بعد تصميم ادوات لتستخدمها فى برامجك او استخدام ادوات من على الانترنت وتوجد ادوات اخرى فى الفيجول , يمكنك ادراجها كما فى الصوره :



وبالضغط Click يمين واختيار Comp.

لسلام عليكم
ماشاء الله الله أكبر هو دا المطلوب
تسلم يابطل
استمر أنا معاك شخصيا
و اتهنى ياعم راح أدعيلك في السجود
إدا صرت مبرمج فرحتني يا خوي
يعطيك العافية كلنا معاك
ياااااااااااااااي و المعلومات الحلوة إلي كتبتها في المقدمة مفيدة بشكل

بارك الله فيك انبسط يا عم دعوة المغاربة حلوة بشكل
تحياتي

بارك الله فيك وسر على بركة الله

ونحن فى أنتظار المزيد

خالص تحياتى

السلام عليكم

أولا أنا أشكر كل من تفاعل مع الموضوع

ثانيا انا سف اخى العزيز FemTo

على تأخرى لكنى كنت مسافر ولسه راجع

وفى أنتظار تفاعل باقى الأعضاء

وياريت تدعيلى من القلب اخى ابن جري...ومشكورعلى المروور لخى عمرو

حمدا لله على السلامه اخىGenUISE ومنتظرمشاركتك..

الخصائص هيا الصفات المختلفه لادوات التحكم مثل ( نوع الاطار , الظهور للمستخدم , امكانيه المستخدم من التعامل معها, لون خلفيتها , صوره فى الخلفيه , ايقوناتها عند التصغير ,......)

وهى متقسمه الى :

Alphabetic-1
Categorized-2

طبعا.عارفين معناهم , هما صنفو ا الخواص مرتين : حسب الترتيب الابجدى, وحسب نوع الخاصيه.(شكلها, سلوكها, وكده يعنى..) وهما اللى هنا نفس اللى هنا بس للتسهيل مش اكثر .


تعالو نشوف خواص الفورم كمثال...


1-Name:
.............

وده الاسم اللى البرنامج بيتعرف بيه بين ادوات التحكم التانيه وباقى عناصر البرنامج( ايوه اسم الدلع)
وده مش بيظهر اثناء تنفيذ البرنامج..


2-Appearance
.....................

وده بيتحكم فى شكل الفورم....وده ليه وضعين اما..flat وهنا بيظهر شكل الفورم كانها مسطحه..3D وشكلها مجسم..


3-Back color
.....................

وديه بتغير لون خلفيه الفورم , وحتلاقيها عباره عن جزئين:

وديه مجموعه الوان النظام اللى الويندز بيستخدمها..ويمكن ان تتغير لون الخلفيه لو غير المستخدم اللون النظام من Display properties

والجزء الثانى منه فيه الالوان اللى انتا لو استخدمتها مش ممكن تتغير (مهما عمل المستخدم)..

4-Border style
………………

وديه بنتحكم بيها فى الاطار بتاع الفورم وهيا ليها حالات كتيره....بس اهم حاجات فيهم.

1-None ومعناها مفيش اطار خالص

2-Fixed Single وديه بيبقى فى اطار ومش ممكن تغيير حجمها اثناء التشغيل

3-Sizable وديه ممكن تغير حجمها اثناء التنفيذ


5-caption
…………

وده عنوان الخاصيه اثناء التنفيذ ...عنوان الفورم..

ولو احنا فى خصائص زر...او عنوان...حتكون كده....( التكست بوكس مفيهوش الخاصيه ده...).



6-control box
……………

وده بيخفى ادوات التحكم فى النموذج زى (التكبير, تصغير , غلق ) وليه حالتين ..نعم True او لا False



7-Enabled
…………
والخاصيه ديه بتحدد هل ستتفاعل الاداه مع المستخدم وتصرفاته او لا...مثلا لوعندنا زرار واحنا عاملين له عدم التفاعل مع المستخدم

فلن ينضغط عند الضغط عليه او ينفذ الكود.ويكتب عنوانه بلون باهت.(منظر بس من غير اى تفاعل)


والخاصيه ديه ليها حالتين نعم True ولا False


8-Font
……..

وديه بتغير شكل الكتابه فى الاداه

وممكن تغير شكل الكتابه بالضغط على الشكل اللى جنب Font بيفتح القائمه دى :


وممكن منها تغير فى البنط....حجم الخط...نوع الخط....


9-Top.Height,Left,Width :
…………………………..

والخصائص ديه بتتحكم فى مكان الاداه على الشاشه , والشكل التالى يوضح لفرق بينها..

مشكور ياغالى على الشرح الرائع

وفى أنتظار المزيد

بارك الله فيك

مشكووور يا غالي

10-mouse icon
mouse pointers
……………

كلاهما يستخدم لتغيير شكل المؤشر عند مروره على الاداه التى نغير فى خصائصها , والاختلاف بينهم ان ال Mouse Pointer يحتوى على بعض اشكال المؤشرات التى يعطيك ايها البرنامج , ولكنك اذا اردت استخدام ايقونه اخرى من جهازك قيمكنك تحميلها من الMouse Icon , ولما تختارها سيظهر لك :

ونختار الايقونه اللى احنا عايزنها...بس احب اقولك ان الايقونه اللى انتا اختارتها مش حتكون شكل الموشر الا لما يكون قيمه mouse pointer=99 زى الصوره

11-mini bottom
max bottom
.....................

ودول ليهم قيمتين.. نعم true و لا false ........الاولى مسئوله عن اظهار او اخفاء علامه التصغير فى الفورم

والتانيه مسئوله عن اظهار او اخفاء علامه التكبير....

.....ممكن واحد يقول احنا اخدنها قبل كده (قصده يعنى على control box ) ...لكن دى تفرق عن التانيه فى التخصص.. ف الكونترول بوكس بيخفى او بيظهر كل الادوات....


12- moveable
……………


وممكن من هنا تتحكم فى قابليه الفورم للتحريك من مكانها..من قبل المستخدم وذالك فى اثناء التنفيذ طبعا....


13-right to left
………………

والخاصيه ديه ليها ليهم قيمتين.. نعم true و لا false ...ودى بتنقل النصوص والادوات من الشمال لليمين...

وديه مهمه فى حاله التصميم باللغه العربيه....لاحظ الفرق بين الصورتين :

False
>>>>

true
>>>>

14-start up position:
…………………..

ومن هنا بنختار مكان ظهور الفورم عند تشغيل البرنامج

15-visible
………..

وديه بتتحكم فى ظهور او اخفاء الفورم... وليها قمتين نعم او لا......

انتا ممكن تسال حنخفى الفورم ليه..انتا ممكن تكون مثلا عامل برنامج فيه كذا فورم..ولما بتختار زر معين يقوم باخفاء الفورم اللى انتا فيها....(visible=false ) ويقوم باظهار فورم اخرى (visible=true )....



16-window state
………………..

وهنا بنحدد الحاله اللى حتكون عليها الفورم عند تنفيذ البرنامج( عادى...فى حاله تكبير...فى حاله تصغير)


17-Show In TaskBar
...............


وبتحدد منها عرض الفورم فى الTaskBar او لا زى ما فى الصوره :

حتظهر زيهم كده لو الخاصيه بتساوى True



18-Picture :
.................

لعرض صوره فى خلفيه الفورم ويجب ان تكون من امتداد مناسب لعرضها.

19-Icon
..............

لتغيير شكل الايقونه للفورم ولما يتم تصغيرها ستظهر فى الTask Bar




دى معظم الخصائص المهمه فى الفورم و منها من يوجد فى اداوت تحكم اخرى ..وباذن الله تعالى سنستكمل الخصائص اليوم مساءا

اخى فمتو والله لااستطيع التعبير عما بداخلى من اعجابى بك وبشرحك انا متشكر جدا بس طلب لو سمحت انا عايز السورس بتاع الفيجوال

Command Button

1- Disabledpicture

وديه الصوره اللى بتظهر على الزرار لما بيكون(enabled=false ) غير متاح......(لو مش فاكر اطلع فوق)


2- Downpicture

وديه الصوره اللى بتظهر على الزر لما بيضغط لتحت وبتروح تانى لما منسيبه..

3- MaskColor

وده بيعمل زى غلاف اوقناع حول الصوره بتاعت الزرار...( يعنى لازم تكون فيه صوره)

وكمان لازم تكون الخاصيه UsemaskColor نشطه


4- picture

وديه الصوره اللى بتظهر على الزر على الزر

وكل الخصائص ديه مش حتشتغل الا لما يكون الاستايل بتاع الزر جرافيك

5-cancel & default


وكل واحد فيهم بيكون لزر واحد فى الفورم يعنى لو تم تفعيل cancel فسيتم تفعيل الزر( اكنك ضربت عليه).لما تضرب على زر ESC

ولو فعلت default فيتم تنفيذ الكود المخزن فيه( تفعيله ) عند ضغط Enter ..


6-Tool Tip Text


وديه الرساله اللى بتظهر لما الماوس يقف على الاداه وهيا تستخدم لتعريف المستخدم بفائده الاداه وهيا موجود بمعظم الادوات.

7-Tab Index , Tab Stop


طبعا عارفين زر Tab اللى فى الكيبورد اللى هوه بينقل التركيز على الادوات المختلفه فى البرنامج , لما تخلى خاصيه الTAB STOP=FALSE لما يضرب على Tab لبكره عمره ما يقف على الزر ده.

اما ال Tab index فترتيب الادوات فى التركيز مع الضغط على tab فحيقف على الاداه اللى Tab Index ليها يساوى 2 قبل اللى فيها يساوى 4 .

Text Box

1-locked


والخاصيه ديه بتديك امكانيه اختيار السماح للمستخدم الكتابه فيه او لا...


2-Max length


وهنا ممكن تختار اقصى عدد ممكن من الحروف او الارقام الممكن كتابتها داخل التيكست بوكس


3-Multi line


وهنا بتسمح للمستخدم الكتابه فى سطر تانى عند ضغط enter او لا..


Password char


وهنا ممكن تعمل الخاصيه دى.وكل حرف فى التيكست بوكس حيظهر زى الحرف اللى انتا كتبه هنا ( مع الاحتفاظ بقيمته داخل البرنامج).... زى باسورد الايميل بتشوف كل حرف كانه نجمه...

5- Alignment

وهيا لاعداد محاذاه النص فى الاداه ليمين او لليسار او فى المنتصف .


6-Data Filed & Data source

وهما يستخدموا اثناء التعامل مع قواعد البيانات حيث تربطا بمصدر والحقل الذى سيتم الحصول منه على البيانات

كما سنرى فيما بعد.


7-ScrollBars

وهما لاظهار شرائط التمرير الافقيه او الراسيه او كلاهما , مع ملاحظه انهم لن يظهرا حتى تفعل خاصيه الMulti Line .

Timer

1-InterVal

كلنا عارفين ان فائده المؤقت تكرار الاوامر المخزنه فيه كل فتره معينه , والخاصيه ديه اللى بيها بنتحكم فى الزمن ده , يعنى التايمر حيكرر الاوامر المخزنه فيه كل (القيمه المخزنه فى الخاصيه ديه / 1000) ثانيه يعنى لو عاوزينها تتكرر كل ثانيه حنخلى قيمه الخاصيه ديه = 1000

Option

1-Value

وقيمه الخاصيه ديه حتساوى True لما يتم اختيارها

CheckBox

1-Value

والخاصيه ديه هنا مختلفه شويه وليها 3 قيم , 0 عندما يكون غير مختار , 1 عندما يتم اختياره , 2 عندما تكون مختاره وغير متاحه لتغير قيمتها من قبل المستخدم

دلوقتى حنبداء فى طريقه كتابه الاكواد ( برمجه البرنامج ) و زى مقولنا قبل كده احنا فى الاول حددنا ادوات التحكم اللى حنحتجها فى برنامجنا, وبعد كده اختارنا خواصهم المناسبه, يبقى مش ناقص غير برمجة البرنامج.

البرمجه:

يعنى بنكتب خطوات البرنامج . وتصرفاته..و رد فعله على تصرفات المستخدم.

مثال:

الالة لحاسبه .. زى البرنامج بتاعنا...

ادوات تحكم < ( مفاتيح الارقام , الشاشه ومفاتيح العمليات الحسابيه)

تصميمها <( ترتيب الارقام فى امكانها..ومكان الشاشه... والعمليات الحسابيه)

البرمجه

يعنى رد الفعل المناسب لفعل المستخدم , يعنى ضغطت زر معين بيكتب رقم 9 على الشاشه , تضرب زر اخر تظهر عمليه معينه جمع مثلا... وهكذا.
ده باختصارمعنى برمجه برنامج.

احنا قولنا ان البرنامج بيتصرف حسب فعل المستخدم....او بلغه البرمجه حسب (الاحداث) اللى بيعملها المستخدم



وتنقسم الاحداث الى

احداث بنعملها بالماوس :



Click : يعنى ضغط الزر الايسر فى الماوس

DblClick : يعنى ضغط الزر الايسر مرتين متتابعتين بسرعه

Dragover : عمليه الدراج يعنى الضغط على الزر اليسر وتحريك الماوس
.
Dragdrop :يعنى ترك الزر الايسر بعد عمليه الدراج

Mousedown : يعنى ضغط الزر الايسر مع استمرار الضغط( بس بدون حركه الماوس...يعنى غير الدراج)

Mousemove : يعنى حركه الماوس(يعنى تغير احداثى الماوس بالنسبه للاداه )

Mouseup: عدم الضغط على الزر الايسر



2-احداث بنعملها بالكيبورد :


Keypress : الضغط على اى زر من الكيبورد


Keyup : عدم الضغط على اى زر فى الكيبورد

Keydown: الضغط على زر مع استمرار الضغط


3- احداث اخرى :

Gotfocus: يعنى التركيز عليها (لما تعمل tab وبيتعلم عليها يعنى التركيز عليها )

Lostfocus : عكس اللى فات كان التركيز عليها وبعد كده مش من عليها( علمت على حاجه تانيه )

Load : عند تحميل الاداه يعنى بده تنفيذ البرنامج...( بتظهر غالبا مع الفورم )

Change : وديه بتظهر مع الادوات اللى يمكن تغير قيمها ( زى التيكست بوكس..لما بنكتب فى او نلغى منه حاجه )

Query Unload : عندما يطلب من البرنامج الاغلاق , اى بعباره اخرى عند الضغط على Close او طلبك للبرنامج بالغاء من الاكواد بعباره Unload ويمكن ان تستفيد منهاباخراج رساله للمستخدم تخبره ان البرنامج سيغلق وتطلب منه تاكيد امر الاغلاق للفورم.

ملاحظه:

وضع Cancel = -1
فى حدث Query Unload يلغى عمليه الاغلاق اى سيجعل ضغط زر Close بدون فائده

تسلم ياغالى وياريت لو أمكن أيميلك

لأنى أرغب فى التعرف عليك

اخوك محمد البحيرة

اهلا وسهلا بك اخى محمد وايميلى : femtoty@yahoo.com

واى حد عاوز يضيفه يضيفه براحته

مشكور أخى FemTo ولكن ياريت

لو أمكن ايميلك على الماسنجر

مع خالص تحياتى

ماشاء الله موضوع قيم أعتبره مرجع بالنسبه لي


بالحقيقه أنا قريت موضوعك هذا والمواضيع المميزه إلي بهذا المنتدى قبل ان أسجل بالمنتدى وأعجبت كثيرا بالمواضيع وهذا الشي الذي دفعني بالتسجيل في هذا المنتدى


و أخيرا ليس آخرا تم تحميل برنامج الفيجول بيسك6 بعون لله وحمده ولكن واجهتني مشكله في تنصيب البرنامج وهي (( حين نصبت البرنامج تم حفظ فايلات البرنامج في مجلد وحين فتحت المجلد رأيت عدد من الفايلات والبرامج طبعا كلها تخص برنامج فيجول بيسك ### السؤال هو أضغط على اي برنامج حتى أشغل برنامج فيجول بيسك ؟؟؟


للعلم اني كنت منزل عدد من الكتب الالكترونيه لتعلم هذه اللغه ولكن بعد ماقرأت المواضيع إلي بالمنتدى مسحت الكتب وقلت بتعلم أول بأول مع الشباب إلي هني ^__^



إن شاء الله ببدء معاك بعد ماعرف كيف أشغل برنامج الفيجول بيسك

السلام عليكم

اعتذر عن تقديم درس اليوم لانه استغرق فى اعداده وقت اكثر من المتوقع واعدكم باذن الله به فى اليومين القادمان,.وياريت يكون مفيد لكم.


اخى مبرمج مميز :

اهلا بك فى منتدنا الحبيب وارجو ان تستفيد وتفيد غيررك

اما بخصوص البرنامج فيها ايقونه علبها مكتوب عليها VisualBasic6

بالإنتظار ياأستاذنا الفاضل

نحن بالأنتظار حبيبى وياريت ايميلك

على الماسنجر تحياتى

يعطيك العافيه

مشكور أستاد على المجهود لتعميم العلم فيى المنتدا
عندي سؤل ؟؟؟؟؟؟؟؟؟؟
ممكن كود طرح وقت من وقت مثل: 01:30:10 - 01:00:00 = 00:30:10
ملاحضة: هدا في 3text
1الوقت الثاني 2 الوقت الأول 3 النتيجة .... ثم حساب التكلوفة بالدقائق أو الثواني
مشكور
وأي معلومات :hakkoum123-123@maktoob.com

التصريحات..Declarations

المتغيرات :



هى عباره عن جزء من الذاكره بنخصصه ونسميه..علشان نخزن فيه البيانات....ده التعريف العلمى , اما معناه فهو زى الشنطه اللى بتجيبها علشان تحط فيها اى حاجه..وطبعا بتختلف حسب الحاجه اللى حتحطها فيها..مثلا شنطه العيش مش زى شنطه الخضار.

انواع المتغيرات :

المتغيرات عامه تنقسم لنوعين.متغيرات رقميه (Numeric) و متغيرات حرفيه (String )..

والمتغيرات الرقميه تتشعب الى كذا نوع بس ممكن عامة نعتبرها ليها نوعين: صحيحه (Integer) و عشريه (Double).


الاعلان عن المتغيرات :

طبعا زى مانتا عارف ان الكومبيوتر مش بيفهم...كل اللى بيعمله انه ينفذ الاوامر . يعنى انتا لازم تقوله كل حاجه...

علشان كده انتا لازم تعرفه انه فيه متغير كمان تقوله نوه علشان يبقى فاهم اللى بيحصل !

ويتم الاعلان عن المتغير زى كده :

سيبك من اول سطر...ركز على المتغيرات اللى انا اعلنت عنها:

هنا فى ملاحظتين :

1- المتغير الحرفى بيشيل حروف وارقام .حتقولى ازاى , فاكر موضوع الشنط...
انا ممكن اجيب شنطه سفر كبيره اووى واحط فيها T-shirt ومش حيحصل حاجه
ولكن مش ممكن تحط الحاجات الل فى شنطه السفر فى شنطه T-shirt ...فهمت
قصدى ؟ .يعنى مش حيحصل حاجه لو حطيت ارقام قى متغير حرفى بس انتا حتكون شغلت حجم كبير من الذاكره على الفاضى..

2- المتغير الاخير اللى انا اعلنت عنه مقولتش نوعه...والبرنامج حيعتبر نوعه Variant .والنوع ده بتدخل فيه كل انواع البيانات وكله على حساب الذاكره المشغوله لما البرنامج يشتغل.




نيجى لموضوع الدرس..اخنا خلاص عارفين دلوقتى ازاى نعلن عن متغير , المشكله دلوقتى مش ازاى المشكله هيا نعلن عنهم فين؟؟

الاعلان برضه مستويات –زى كل حاجه – فانا مثلا لو عايز اقول حاجه ففى كذا خيار اخليها سر . فاقولها لشخص واحد بس , او ممكن اعلنها على نطاق ضيق اقولها على مستوى الاهل والاقارب او اعلنها للناس جميعا.اروح منزلها فى الجرايد....

فمثلااا :

1-انا لو عايز اعلن عن متغير ومش حستخدمه الا فى سطر واحد فى Command Button فملهاش لازمه انشر الخبر وكفايه اقول للCommand بس عن المتغير ده :

2- اما لو حعمل متغير وكذا حاجه فى الفورم حتستخدمه..فممكن اذيع عن المتغير ده على مستوى الفورم :

3- اما بقى لو انا عامل كذا فورم فى المشروع بتاعى وعايزهم كلهم يستخدموا المتغير ده ,

فبعلن عنه فى حاجه اسمها Module : وديه تجيبها ازاى؟..

تسلم استاذنا العزيز على الدرس الجميل وفى أنتظار

باقى الدروس وارجوا وضع أيميلك على الهوتميل أفضل من الياهو

مع خالص تحياتى

السلام عليكم ورحمة الله و بركاته

أعتذر على التأخير في الانضمام اليكم

واصل أخي الحبيب

المساعدة

تعالو1 نتكلم اكتر عن المتغيرات

المتغير Variable :


عباره عن المحتوى اللى بتتخزن فيه البيانات.( الدرج اللى بتشيل فيه هدومك) ,....وممكن تسميه باى اسم بس بشروط :

شروط اسم المتغير:

1- ان لا يبداء برقم او برمز

يعنى ممكن تسمى متغير A1 لكن لا يمكن تسميه متغير 1A

2- ان لا يحتوى على مسافه .....(يمكن استخدام _ ).

ممكن Phone_Number لكن لايمكن تسميته Phone Number

3- ان لايزيد عن255 عنصر

يعنى مجموع جميع عناصر الاسم (ارقام , حروف , اشكال) عن 255

4-ان لا يكون اسم اى جمل برمجه او حاجه فى تكوين البيسك

يعنى لايمكن تسميه متغير IF

5- ان لا يكون موجود قبل كده .



انواع المتغيرات

1- رقميه

2- حرفيه

3- مختلط ( وده يشمل النوعين اللى فاتوه )

4- Boolen وهو المتغير الذى له قيمتين فقط (نعم او لا)

يعنى (ذكر او انثى) , (متزوج ام لا ) يعنى الاحتمال من اتنين مش اكتر

و المتغير الرقمى ليه تقسيمه تانيه وحنذكرها فى الوقت المناسب ( ارقام صحيحه , عشريه,..........)

وانا مش حكتب الجدول الكبير بتاع المتغيرات ومداها..علشان كله عارفه والجدول ده مش للحفظ وممكن ترجعله اثناء تنفيذ البرنامج


طريقه تعريف المتغير فى البرنامج :


احنا عايزين نعرف حنعمل متغير ليه؟


1- ممكن عايزين نعرف المستخدم حيختار ايه من رساله طلعتلو...فنساويها بمتغير..فقيمه الاختيار حتتخزن فى المتغير ده. وبمعرفه قيمه الزر يمكن معرفه نوع الزر اللى هوا اختاره .

2- ممكن عايزين نعرف المستخدم كتب ايه فى تيكست بوكس و بالتالى يمكن اجراء اى عمليات على القيمه المدخله مع الاحتفاظ بالقيمه الاصليه

وديه مش بس الحاجات....دى امثله بس .

قواعد كتابه المتغيرات :

1- لازم نعرف البرنامج الاول على المتغير

ازاى:

Dim Ahmed As AhmedT

و بدلAhmed بتكتب اسم المتغير وبدل AhmedT تكتب نوع المتغير

* ولو انتا مكتبتش نوع المتغير بيعتبره مختلط (Varient )



2- كيفيه كتابه المتغير :

بيكتب المتغير اللى احنا عايزين نخزن فيه على الشمال والحاجه اللى فيها القيمه الاصليه على اليمين

ازاى :
......

A, B احنا عندنا متغيرين


واحد فيه قيمه والتانى لا... احنا عايزين الاتنين يكونوا يساواو نفس القيمه التى فى المتغير A


حنكتب الكود كده :


1- حنعرف المتغيرين :
Dim A as Byte

Dim B as Byte

2- حنكتب القيمه المعروفه :


فكرين ازاى:

A=6

3- حناخذ نسخه من بيانات المتغير ونحطها فى التانى:

A=B

طبعا انتا اختو بالكم ان الكود ده غلط.....( ليه)

علشان زى ماانا قولت ان اللى على الشمال بياخد قيمه اللى على اليمين . وطده بقت قيمه المتغيرين =0 .


لكن الصح :
B=A



طب لو عايزين نعمل عمليه حسابيه بقيم او بمتغيرات ونحطها فى متغير


وكذالك العمليات بتتكتب على اليمين , والمتغير اللى حنخزن فيه يكون على الشمال

C=A+B

وكذلك يمكن تعريف اكثر من متغير فى نفس السطر..

ملاحظه :عند تعريف :

Dim A , b as string

اللى حيتعرف هنا ال A كمتغير من نوع مختلط Varient

وال b من النوع نصى علشان مكتبتش نوعه.. والصح Dim a as string ,b as string

اول برنامج

انتا لما تيجى تطلب منى حاجه حتوقلى ايه....طبعا حتوقلى يا ( احمد ) اعمل (كذا)....

وعند البرمجه كذالك بنعمل نفس الحاجة..بنادى على الاداه وبعد كده , نطلب منها تعمل ايه (من خصائصها طبعا) ... مفيش حد ممكن يعمل حاجه مش من مقدرته.


الاسم :.... وطبعا حندلعها...فنادى عليها بالاسم اللى موجود فى الخاصيه ( Name)

والخصائص :...... واحنا قولنها قبل كده.


طريقه كتابه الامر


بنكتب اسم الاداه وبعد كده (.) وبعد كده الخاصيه اللى احنا عايزينها :


مثال1:

عايزين نغير اسم الزر الى اهلا :

الكود :

كود

Command1.caption=”اهلا”

طبعا حتقول ليه حطيت (اهلا) بين علمتين التنصيص.... اولك انا... علشان ديه ولا متغير يعرفه البرنامج ولا حاجه يفهمها الفيجوال بيزيك... فنحطها بين علمتين التنصيص علشان يحطها زى ما هيا..ما يحولش يفهم اى حاجه....


مثال 2:


عايزين نغير اسم الفورم لما نضرب على زر الى (اهلا)


الحل :



فاكر خطوات عمل برنامج :


1- الفكره:. نعمل برنامج لما نضرب على زر يتغير اسم الفورم الى اهلا .

2- الادوات : احنا محتاجين زر بس

3- التصميم :

انتا فى المرحله ديه تغير خصائص ادوات التحكم بتاعتك..زى متعلمنا..


4- كتابه البرنامج:

احنا عايزين ايه يحصل ؟؟؟......لما نضرب على الزر يتغير اسم الفورم. .فلازم يكون الكود فى الزر....

فتيجى على الزر و اعمل (نقراا مزدوج) ..حيفتح الكود بتاعه


احنا عايزين الكود يتنفذ لما تضرب على الزر ( يعنى الحدث هو كليك)..ونبداء نكتب الكود :

كود

Form1.caption=”اهلا”

5-تجربه البرنامج:

ولتنفيذ البرنامج اضغط شكل السهم الازرق فوق او اضرب على (F5)


ولو عاوز تعمل نسخه ExE من البرنامج من قائمه File اختر Make ExE

( يعنى نخلى البرنامجExtuable يعنى يشتغل بمفرده بدون الحاجه للفيجول بيزيك)



مبروك عليك اول برنامج ليك.

ملاحظه :
نظرا لضيق الوقت ووجود مشاكل بجهازى لم استطع تجهيز صور..ولو فى اى مشاكل او اى حاجه مش مفهومه من فضلك اخبرنى

.

الله يعطيك العافية .. استمر في الموضوع القيم !!

شكرا على مجهود الجميل يا غالى
واتمنة تنك تستمر فى الدروس

بسم الله

ياريت تجميع الدروس في ملف واحد.

وشكرآ.

انا سف جدا على التاخير ياجماعة........بس والله عندى ظروف فى الكليه والدراسة...

وانا شاء الله حنستكمل الدورة.. بحضر درس باذن الله , ومشكورين الاخوة المتابعين وانتم سبب استمرارى فيها..

وبخصوص اقتراح اخى الAlmazzy سيتم ضم كل مستوى فى ملف قريبا..بس زى ماناتا شايف لسه الدروس قليله نوعا




انا سف جدا على التاخير ياجماعة........بس والله عندى ظروف فى الكليه والدراسة...

وانا شاء الله حنستكمل الدورة.. بحضر درس باذن الله , ومشكورين الاخوة المتابعين وانتم سبب استمرارى فيها..

وبخصوص اقتراح اخى الAlmazzy سيتم ضم كل مستوى فى ملف قريبا..بس زى ماناتا شايف لسه الدروس قليله نوعا

بانتظارك أخي FemTo ونسأل الله أن يبارك لك في وقتك

جزاك الله كل خير وبارك الله فيك اخي ....

اهلا وسهلا بكم في منتديات جاد القرعان للبرمجة


منتديات جاد القرعان للبرمجة

السلام عليكم ورحمة الله وبركاته

اولا اعتذر عن طول الغياب لكنها ظروف خارجة عن ارادتى , وباذن الله سنستكمل الدورة
ثانيا : ارجو من الاخوة المشرفين فتح الموضوع الاصلى وضم هذه المشاركة اليه حتى تكون مرجع دائم وسهل العثور عليه
ثالثا :ارجو لو فيه اسئلة ان لاتترددوا علشان نجمعهم مع الكتاب باذن الله لتعم الفائدة

اعتذر عن الاطالة ..

الجزء الثانى:


الجمل البرمجيه:

زى مكل شعب ليه لغته , برضه البرمجة ليها جملها الخاصة وهيا مش بتتغير من لغة لاخرى , لكنها بتختلف فى طريقة كتابتها


1- جمله التخصيص :

يعنى بتخصص قيمه بوضعها فى متغير

اما بطريقة مباشرة زى :




او ناتج عمليه حسابيه




او ناتج استخدام داله




وحنقول الكود السابق لاحقا فى الدوال بأذن الله


وبالمناسبه حقولك اولويات العمليات الحسابيه:يعنى لو فى اكتر من عمليه حسابيه على نفس السطر.مين يتنفذ الاول.

1- العمليات اللى بين القوسين
2- الرقم المرفوع لاس
3-الضرب والقسمه
4-الجمع والطرح


ولو فى عمليتين من نفس الدرجه على نفس السطر يتنفذ اللى على الشمال.

2- جمله التعليق :



يعنى بتكتب تعليق قبل الكود لاى سبب..والتعليق ده ليك او للمبرمجين اللى شاغلين معاك على نفس البرنامج فمع كبر عدد اكواد البرنامج , او عملك عليه فى فترات متباعدة , والبرنامج مش بيعرف اى حاجه عن الموضوع ده , يعنى مش بينفذ ولا بيبص على السطر ده خالص , واثناء تنفيذ البرنامج لاتظهر للمستخدم

وكيفية كتابتها

كل ماعليك انك تكتب ' قبل الكلام اللى انتا عايز تكتبه..وبتكتب لما تضرب حرف ال (ط) واللغه انجليزى...وحتلاقى السطر لونه بقى اخضر..




3-جمل الاستدعاء :

يعنى انتا بيكون عندك برنامج فرعى...مش مرتبط باى حاجه..وانتا بتنادى عليه (بجمل الاستدعاء) علشان يبداء يشتغل..
والبرامج الفرعيه ليها واقفه معانا...( يعنى انتا لو بتعمل برنامج عن تاريخ الميلاد بيعمل اى حاجه فيه..انتا اكيد محتاج تتاكد ان التاريخ اللى دخله تاريخ مش رقم تيلفون مثلا....ممكن تكتب خطوات للتاكد...

بس لو انتا عايز تتاكد برضه لما يدخل تاريخ ميلاد خطيبته (مثلا..)لازم تتاكد برضه انه تاريخ.. ومش معقول انك حتكرر الخطوات تانى.. يبقى نعمل الاختبارات فى برنامج فرعى.. وننادى عليه فى الحالتين..

وكمان البرامج الفرعية مفيدة اووى فى اعادة استخدام اكواد من البرنامج فى برامج اخرى , وتسهل ايضا عملية تطويره فالكود المسئول عن وظيفة معينة فى مكان منفصل وغير متشابك مع البقية

طريقه كتابته :



حيث فيمتو هو اسم البرنامج الفرعى.... واللى بين القوسين تبقى سين مع البرنامج اللى بتنادى عليه.. زى :

احنا لو عملين برنامج بيصدر صوت..ولو احنا عايزين نخليه يصدر الصوت عدة مرات مختلفه ممكن نظبطه بيحث تكون القيمه اللى ببعتها مع جمله الاستدعاء هيا عدد مرات اصدار الصوت.

جمل التكرار :

يعنى لو احنا عايزين نكرر كود معين او بنعمل عداد ممكن نستخدم جمل التكرار:

وجمل التكرار بتنقسم لنوعين :

1- تكرار محدود :

يعنى شغاله فى فتره معينه...ولازم نديلها بدايه ونهايه الفتره , وبتفضل شغالة فى الفترة ديه دون الاخذ فى الاعتبار اى شرط او خلافه
وهيا اتسمت محدودة علشان احنا بنكون عارفين بدايتها ونهايتها , حتسالنى "هو ممكن اعمل تكرار لحاجة مش عارف قد ايه حكررها " اقولك اكيد والرد كمان شوية

شكل الكود :



مع العلم ان قيمة العداد ستكون فى المتغير بتاعه وهو فى حالتنا sOSo

حيث :

A بدايه الفتره
B نهايه الفتره
C مقدار الخطوة او ال STEP

Step:
>>>
وديه القيمة اللى بنزودها على القيمة الابتدائية ونزيدها على الناتج حتى نصل للقيمة النهائية

مثال : لو الخطوة = 1 و القيمة الابتدائية = 0
فحتكون قيمة المتغير 1 و2 و3 و4 و5 ....
لو الخطوة = 2
فحتكون قيمة المتغير 2و4 و6 و8 و10 ....

Next
>>>
وهنا بتقول للبرنامج ارجع و زود المتغير بتاعنا بقيمه الخطوه...

ملاحظه هاااامه :

1- لن يتم تنفيذ اى كود مكتوب بعد Next الا لما تنتهى الفترة
2-مش لازم استفيد من قيمة متغير العداد , وممكن اعمل العداد بس علشان اكرر الكود بين For و Next مدة الفترة.

ولو فى حاجة مش واضحة تعالى نشوف مثال :

مثال:

احنا عايزين نعمل برنامج يجمع الارقام الزوجيه بين 0 و 10 ..ويطلع الناتج فى رساله.

يلا نفكر مع بعض :

طبعا حنستعمل التكرار المحدود علشان احنا عارفين بدايتنا واخرنا فين....... فكر فى البرنامج؟؟

الحل :




فى اسئله؟؟

اكيد لازم يكون فى..

1- ليه انا اخترت المتغير ان يكون نوعه بايت...علشان مجموعهم عمره ما حيعدى 255 وعلشان كده نوفر مساحه فى الذاكره..

2- ايه المعادله الغريبه ديه؟ Toto=toto+soso



انا عارف انها غلط رياضيا. .بس صحيحها برمجيا....امشى معايا واحده واحده....

الطرف الشمال فى المعادله هو القيمه اللى احنا عايزينها..مجموع الارقام الزوجيه بين 0 و 10 .....

وعلشان احنا مش محددين قيمته الابتدائيه ..فالكمبيوتر بيحدد قيمته حسب المحايد للعمليه..(يعنى لو جمع = 0 , ضرب = 1)

واحنا عارفين دائما ان اليمين بيحط قيمته فى الشمال ....فا اعتبر نفسك الكومبيوتر وتعالى نعمل العداد :

*** اول قيمه صفر لان اول العداد صفر وعلشان كده الثابت اللى على الشمال =0

*** تانى قيمه (سوسو) =2 و (توتو ) زى مهيا صفر ...فالقيمه النهائيه =2 ...وعلشان كده (توتو) حتساوى 2

وهكذا يعوض بيها لحد مالفتره تخلص.....وبعد كده ينفذ الامر اللى بعد كده ويطلع رساله بالقيمه اللى احنا عايزينها...

وانا عارف اننا لسه متكلمناش على الدوال بس اعرف دلوقتى ان اظهار رسالة بها ناتج بنستخدم

جمل التكرار الغير محدوده

والتكرار الغير محدود بيتكرر او لا حسب تحقق شرط معين من عدمه

او

هيا الجمل اللى احنا بنكرار الخطوات او العمليات اللى فيها عدد من المرات غير معلوم بالنسبه لنا...ازاى؟؟؟

يعنى احنا لو عايزين نجمع متغيرين بيزيدوا. بقيم ثابته بحيث لايتعدى مجموع الاثنين 100 ..احنا طبعا مش عارفين ايه عدد المرات الازم. حتى يصبح مجمعوهم يساوى 100 ....فلازم نستخدم جمل التكرار الغير محدوده.. والشرط هوه مجموهم يساوى 100


وهما صورتان..

1-



DO while , loop من بناء الكود

(سوسو). الشرط لازم تحققه لاستمرار الدوره
و(توتو) الشروط التى بتكرر مع تكرر الداله...

والشرط ممكن يكون معادلة رياضية , تساوى بين متغير وقيمة او اى حاجة تانية



هنا بقه مختلفه عن التانى فى..

الكود معناه نفذ الدوره الى انا يتحقق الشرط(سوسو) وبعد كده اخرج من الدوره......

***لسه مش فاهم...تعالى على المثال:


طبعا هنا حتطلع قيمه المتغير=0 ؟؟؟
زى ما احنا عارفين علشان احنا محددناش القيمه الابتدائيه ليه.حيحطها ب0 ولان الشرط بتاع اللوب لم يتحقق.لم ينفذها....

فطبع القيمه الابتدائيه ليها 0...

وباستخدام الصيغه التانيه:




وهنا حتطلع القيمه=9 .....انتا اكيد اخدت بالك من الفرق بينهم:

1- الاولى: بتنفذ الدوره طالما الشرط اللى مكتوب شغال..

التانيه: بتنفذ الدوره حتى تحقق الشرط وبعد كده تطلع منها

2-الاولى: مش بتدخل فى الدوره حتى تحقق الشرط

التانيه : بتنفذ الدوره ولاوامر بتاعتها وبعد كده بتشوف الشرط..( علشان كده طلعت قيمه الاولى 0...والتانيه= 9)







احنا واحنا بنقول العمليات الحاسبيه ماقولناش..اداتين من ادوات القسمه:

1-
\
....


وديه غير بتاعن القسمه العاديه (/) ....وديه بتطلع الناتج الصحيح من القسمه....يعنى ايه :

يعنى 5 على 2 يساوى كام...اكيد حتقول 2.5.......ولو احنا استخد منا الاداه ديه مع العمليه ديه..حيطلع الناتج=الناتج الصحيح من القسمه=2


بتنفع في ايه؟؟؟؟

المفروض اللى انتا مبرمج...يعنى انتا بتطوع جميع الادوات المتاحه ليك.علشان تساعدك..انا حقولك فكره من افكار استخدام الاداه ديه:

مثلا..لو قسمنا عدد زوجى على 2 مش حيبقى فيه باقى قسمه يعنى ناتج القسمه بيها..حيساوى ناتج القسمه العاديه...ولو مساواش يبقى الرقم فردى..


MOD- 2


وديه بتطلع باقى القسمه...يعنى لو 5 على 2 حيبقى الناتج..= .5 اللى هو باقى القسمة يعنى اللى بعد العلامة العشرية

[color=#330099]بتفع فى ايه:[/color]

مثلا..احنا لو عندنا رقم كبير وعايزين نحلله الى احاد,عشرات..

يبقى حنقسم على عشره ونحفظ باقى القسمه..

موضوع اكثر من هايل جزاك الله كل خير علي مجهودك ده

جمل اتخاذ القرار :

انا مش بحب التعقيد...يعنى ايه اتخاذ قرار؟؟؟....يعنى لو حصل كذا يبقى لازم انا اعمل كذا...ولو محصلش ياما مش حعمل حاجه..ياما حعمل حاجه تانيه .

جمله If

تكوينها :



حيث(توتو ) شرط.... (سوسو, نونو ) مجموعه اجراءت او عمليات.


طريقه العمل:


لو (توتو) اتحقق..يبقى نفذ (سوسو)...ولو متحققش..نفذ (نونو).....

Else : انتا لو مش عايز تعمل حاجه لو الشرط ماتحققش..مش لازم تكتبها

End If : فديه اساس من اساسيات الجمله ولازم تكتب فى اخر الجمله....

حالات خاصه :

لو البرنامج فيه من خطواته كذا جمله (if)..داخله جوه بعض لازم كل واحده تتقفل ب (End If).

**
على فكره فيه صوره تانيه لقاعده If وهى



وزى ما هوه باين ان الصوره ديه لايوجد بها End If واستخدم الطريقه اللى تعجبك حسب البرنامج ,

ولو عاوز تضع اكثر من شرط بعد Then ممكن تفصل بينهم باستخدام :

[center]