أريد ماكرو في اكسل لاظهار رسالة عند تاريخ معين

[usama5 0]

السلام عليكــم ورحمـة الله وبركاتــه ،،

(توجد بعض الاوراق النرتبطه بتواريخ معينه مثل مواعيد دفع الضرائب او التأمينات اذا تم التأخير في دفعهم يتم الدفع بغرامه,,,)لذلك اطلب من الاعضاء ذوي الخبره مساعدتي في اعداد ماكرو في الاكســـيل برساله تظهر عند تاريخ معين اذا تم توافق التاريخ الحالي مع تاريخ الدفع تظهر رساله تنبيه تنبه ان الموعد المحدد اليوم...

وشكرا للاهتمام والمساعده...

تم تعديل 20 Jul 2009 بواسطه همام ابوعرقوب

[SLAVE 15]

الحمدلله والصلاة والسلام على رسول الله وعلى آله وصحبه أجمعين

بص يا عم أسامة انت دخلت حارة غلط

الحارة دى بتاعة بتوع البتاعة اللى اسمها أكسس

يعنى هتفضل تدلل على الموضوع بتاعك وبعدين يقوم واحد واخدك ماوسين على واحد كيبورد تبقى مش بتلتزم بقوانين المنتدى

هتقول انت جاى تهزر 

اقول لك لا يعمنا احنا كلنا بنقع فى أزمات وياما أهل المنتدى لحقونا

بص يا عسل:

فيه طريقة حلوة وبسيطة للتنبيه على التاريخ تعرف تعملها لوحدك من غير ماحد يعملها لك:

ركز معايا:

 1- حاول تخلى كل التواريخ اللى انت محتاج تقييمها فى مكان واحد 

 يعنى عمود واحد مثلا واعمل فيه ارتباطات بخلايا التاريخ فى المستندات المختلفة

2- لنفترض ان العمود اللى انت حاطط فيه التواريخ هو C مثلا

3- روح لخانة فاضية (بعيد عن العمود c) واقف عليها عشان نعمل معادلة

4- استخدم الدالة

countif

 

الدالة دى هيطلع لك فيها معاملين:

  أ- المعامل الأول هو معامل النطاق

  يعنى لو العمود c هيبقى مثلا النطاق C:C

  ب- المعامل الثانى هو "ما الذى تبحث عنه"

  ولنفترض أننا نبحث عن كل التواريخ التى تسبق تاريخ اليوم الحالى بخمسة أيام

  فنكتب فى هذه الخانة ما يلى

TODAY()-5

بس خلاص :)

ايه اللى انت عملته دلوقتى يا ريس؟

انت استخدمت دالة countif والتى تقوم بعد حالات حدوث ما تبحث عنه (الحالة) داخل مدى معين (النطاق)

انت بقى وشطارتك بعد كدة

يعنى مثلا اعمل تنسيق شرطى للخانة اللى هيطلع فيها النتيجة لما تبقى أكبر من الصفر يبقى لونها فحلقى

(ايه فحلقى دى بلاش خليه بهبهانى ... يا عم باهزر)

يعنى عيش حياتك يا باشا

على فكرة الشكل النهائى للمعادلة هيبقى كالتالى:

=COUNTIF(C:C,TODAY()-5)

اخوك

slave

تم تعديل 19 Jul 2009 بواسطه SLAVE

[usama5 0]

السلام عليكــم ورحمـة الله وبركاتــه ،،

اولا ...لاداعي للمقدمات الجميله اللي قدمتها وتقديم الخير بدون مقدمات..ثانيا اشكرك علي اهتمامك بالرد ع الموضوع اللي مش في مكانه الصحيح

وثالثا وده الاهم سبب وضعي هذا الموضوع في قسم الاكسس لاني طالب رساله تظهر عند تاريخ معين بمعني انها تحرر من الفيجوال بيسك الخاص بالاكسيل..

وطبعا علي حد علمي ان الاكسس معظم شغله فيجوال بيسك ..واسف ع الاطاله

تم تعديل 20 Jul 2009 بواسطه usama5

[SLAVE 15]

بسم الله الرحمن الرحيم

طيب بص يا عسل

انا على قد علمى عملت ماكرو يحقق اللى انت عايزه بس فيه مشكلة واحدة

انه مش بيشتغل تلقائيا

يعنى انا عملت الماكرو وبعدين عينت له زرار فى شريط القوائم

لما تدوس على الزرار ده

تطلع لك رسالة من البرنامج تقول لك فيه كام مستند قرب ميعاده

العدد انت بتحدده بمعيار

يعنى تطلع رسالة تقول لك ان فيه 3 مستندات باقى عليهم 5 ايام مثلا

لو الموضوع يناسبك نتكلم فيه وابعت لك الماكرو

اخوك

slave

[usama5 0]

بسم الله

شكرا لتعاونك لايجاد المطلوب حتي ولوبجزء منه ....طالما انك عملت الماكرو اعتقد انك لو دخلت لمحرر الفيجوال بيسك ممكن نضيف قاعده IF ونربطها بالماكرو الخاص بتاعك,انا بقول الكلام ده لاني قرأت قبل كده وكان عباره انك تضغط علي زرار الخروج تظهر رساله تقولك نعم او لا... داخل المحرر مكتوب لو نعم تبقي حاجه معينه...وكذلك لو لا تبقي كذا وكذا

فلو فعلا تعرف تضيف هذه القاعده ممكن تؤدي الغرض المطلوب...واسف علي الاطاله في هذا الموضوع

[SLAVE 15]

بسم الله الرحمن الرحيم

الحمدلله والصلاة والسلام على رسول الله وعلى آله وصحبه أجمعين

والله انت زى العسل

انا يا سيدى عملت الماكرو زدخلت الفيجوال بيسك وقعدت أدور على "حدث" يشغل الماكرو

اى حاجة تقول لما البرنامج يفتح أو لما الصفحة تتغير مالقيتش

بس لما انت كتبت التعليق بتاعك رحت دورت تانى 

والحمد لله لقيت حدث"فتح الملف" حاجة زى الفل

بص ياجميل

هتلاقى فى المرفقات ملف اكسيل اول ماتفتحه تطلع لك رسالة تقول لك

كام مستند عندك محتاج أكشن

انا شارح لك فى الكود شرح بسيط

الموضوع عبارة عن ماكرو

وعند فتح البرنامج يشتغل الماكرو

بص عليه وبعدين نتكلم

أخوك

slave

OpenMacro.rar

[usama5 0]

بسم الله

يعني والله ده كتيرعليه ...تم فهم الشرح وتجربه الماكرو وهوه طبعا هيفيدني في المطلوب..اشكرك

*بس لي طلبين*

1-هل من الممكن ان تكون الرساله تقول باقي كذا يوم..يعني مثلا باقي 5 ايام علي عمل كذا..!؟؟

2-انا محتاج اتعلم دراسه الفيجوال بيسك( ببساطه),, اولا لان بصراحه كذا كتاب نزلته بس مش مستوعب الكلام المشروح فلو عندك كتاب او موقع سلسل في الشرح اكون مشكور لو بعتهم ولك جزيل الشكر..

تم تعديل 21 Jul 2009 بواسطه usama5

[SLAVE 15]

السلام عليكم ورحمة الله

شكلك مش ناوى تدفع تمن الرد

ان ما بكلش من الكلام ده

التمن بسيط ولكنه عند الله كبير

إدعى لوالدى بمنبر نور يوم القيامة

أما بخصوص التساؤلات بتاعتك

هاجاوبك على التساؤل التانى الأول

أحسن حاجة انا شايف انك تعملها

أولا:

حدد انت عايز ايه من الفيجوال بيسك

عشان تعرف هتمشى فيها ازاى

لأنك ببساطة ممكن تستخدمها كأداة تخدم عليك فى مشروعاتك (سواء على الأكسل أو الأكسس)

أو ممكن تتعمق فيها عشان تكون مبرمج

وأنا أنصحك أنك تتعامل معاها كأدة تستخدمها استخدامات محدودة فى مشاريعك

كدة هتفرق معاك فى حاجات كتير منها انك لما تلاقى نجاحات صغيرة جدا (زى الماكرو اللى احنا عملناه) النجاحات دى هتديك احساس بالإنجاز يدفعك انك تتقدم خطو خطوة نحو الاحتراف

أما أنك تخش فيها بصدرك (وخصوصا لو دراستك الأساسية مش كمبيوتر) فكتير من الناس بتقف ومتكملش عشان بتلاقى الموضوع كبر عليها مرة واحدة.

عموما الاختيار بتاعك وفكر فيه كتير عشان هتفرق معاك جدا ... ورأييى أنك تحترف أكسيل الأول ... أقول تحترف ... يعنى حاول تعرف كل كبيرة وصغيرة (بمعنى كل كبيرة وصغيرة) ... بكدة هتستفيد فى شغلك وهترتقى فى معرفة جزئيات كتيرة جدا ... لما تيجى تخش فى البرمجة هتلاقى انك عمال تركب ميكانو.

ايه الرغى ده ...

ده انت رغاى أوى

الله يسامحك

الخلاصة:

انك بعد ماتقرر انت عايز تعمل ايه بالبيسك

خش على

منتدى مبرمجي Microsoft Visual Basic.NET

الموجود فى المنتدى الجميل بتاعنا ده

وده ان شاء الله هيكون كنز ليك

بس زى ما قلت لك

حدد الأول انت عايز ايه من الفيجوال بيسك عشان ماتتهش (حلوة مات ت توهش دى؟)

أما رد التساؤل الأول (شكلك نسيته :) )

هو بسيط ولكن عايز اعمله لك بالشرح عشان تعرف تغيره بعد كدة زى ما انت عاوز

فسيبنى اجهز لك شرحه ولوعرفت اعمله لك النهاردة يبقى خير لو مش كدة سامحنى وان شاء الله على يوم الاثنين او الثلاثاء الجاى اكون عملته لك بس عشان ظروفى

ربنا يبارك فيك وينفع بيك

أخوك

slave

[usama5 0]

بسم الله

بجد بجد انا شاكر اهتمامك بالموضوعين الاول لتوجيهي في تعلم او فهم الفيجوال بيسك وثانيا لعمل المطلوب في الموضوع

مشكور...

[SLAVE 15]

السلام عليكم ورحمة الله وبركاته

أنا آسف اتأخرت عليك وذلك لظروف سفر

لو لسة عايز الشرح قول لى وانا اعمله لك

أخوك

slave

[hammamsana 136]

اخي الكريم.. سبب النقل الى هنا هو علاقة القسم مباشرة بهذا التصنيف من الاسئلة، وهي خاصة ببقية برامج اوفيس .. واريد ان اشير الى ان اوامر محرر فيجوال بيسك في اكسل تختلف تقريبا بشكل كبير عن أكسس، ولكن يمكن من اكسس التحكم في ملفات اكسل وذلك باوامر من فجوال بيسك الخاص بالاكسس، ولهذا تم النقل.. وعليه اذا رغبت اخي الكريم بالاستزادة.. تفضل بالعودة وزيارة قسم الاكسس نكن شاكرين لك وللاخ SLAVE على جهوده الطيبة

تحياتي

[ahmed81 0]

الاخ العزيز SLAVE تحيه طيبه وبعد

كل عام وانت بخير

قعدت ساعات على النت ادور على الموضوع ده ماكرو تشتغل فى ميعاد معين بتنبيه بس للاسف الماكرو بتاعتك مش عايز تشتغل معايا فى حين انا شغال office 2003 وحولتها بس للاسف انا مش عارف اشغل الماكرو دى ازاى يا ريت تشرح اكتر

شكرا لك

[SLAVE 15]

السلام عليكــم ورحمـة الله وبركاتــه ،،

وانت بألف خير 

أنا عملت لك الملف بصيغة 2003

وكمان عملت لك ملف صغير تانى يشرح الموضوع ببساطة وهو عبارة عن 

رسالة تظهر عند فتح ملف الاكسل تستطيع أن تتحكم فيها بكل بساطة

الملف الأول أسمه

OpenMacro2003

والملف الثانى أسمه

OpenMessage2003

وأى شرح أنا تحت أمرك

أخوك

slave

OpenMacros.rar