Ahmed Metwally

كورسات و شهادات معتمدات

46 ردود في هذا الموضوع

من كام سنة كده و الدنيا كلها بتلف حولين نفسها

و عماله تقول شهادات معتمدة من شركة مش عارف ايه

و كورسات عالمية من اللى هي

و خد الكورس و انت تضمن شغل فى اى حتة نضيفة

و الشهادة دى بئى لو معاك تبئى انت واد من الأخر

و تلائى يا عينى الواد الغلبان من دول أول ما يتخرج

يروح على أى مركز دورات تدريبية من اللى بيشوف اسمه كل يوم فى الجرايد

و يدفع دم قلبه و يقعد كام شهر صاحى نايم بياخد كورس

و بيتعلم حاجات جامدة أوى عمره ما كان هيعرفها لوحده

و يخلص الكورس و يمتحن الواد و ينجح

و بعد كام شهر يبعتوا له الشهادة فى طرد محترم

مكتوب عليه كلام انجليزى كتير

و جواه شهادة و بطاقة زى بتاعة البنك

و دبوس بأسم الشهادة علشان يعلقه على صدره

و ياخد الواد الشهادة و يكتب سيرة ذاتية محترمة

مترتبه و متنظمة وفقاً لقواعد كتابة السى فى المتعارف عليها عالمياً

و ينزل يا حبة عينى للشركات المالتى ناشونال

و حاطط فى دماغة انهم أول ما يشوفوا الشهادة اللى معاه

مش هيسبوه يخرج من باب الشركة

و هيكتبوا معاه عقد عمل و هو قاعد

وهياخد له كام الف فى الشهر

نظير الخدمات النادرة اللى هو هيقدمها لهم

و يروح الواد و يقدم السى فى

ويقابله واد فى نفس سنة محترم كده ولابس بدلة " ماركو فيرى "

و على وشة ابتسامة باردة كده مافهاش اى احساس

أو تقابله واحدة حلوة من اللى بيطلعوا فى المسلسلات الأمريكانية

و على وشها نفس الأبتسامة

و كأنهم دارسنها فى الجامعة أو واخدين كورس فيها

و ياخدوا منه السى فى ... وشرفتنا .... ابئى عدى ... و ماتقطعش الجوابات

الواد يسأل طب مافيش انترفيو !!

فجأة تلائى الأبتسامة الباردة اتغيرت لأبتسامة عطف و شفقة و حنيه

انترفيو ... !!

و تتحول الأبتسامة بتاعة الشفقة لنظرة " انت عبيط يا بنى "

ان شاء الله لما نحتاج هنتصل بيك على طول

و يخرج الواد من أول شركة راح لها و هو مش فاهم حاجة

و يصبر نفسه و يقول ماشى دول مش عايزين حد

خلاص ندور على الشركات اللى عايزة ناس تشتغل

و يبدأ رحلة حلوة مع جرنان الأهرام بتاع يوم الجمعة

و مواقع التوظيف اللى النت بئت غرقانة بيها اليومين دول

و يروح لشركات عايزة ناس تشتغل

و يقابل نفس الواد و نفس البنت اللى قابلهم فى الشركة الأولانية

و على وشهم نفس الأبتسامة اياها

و يسمع نفس الكلام

بعد كام شركة كده

يقرر الواد انه يتنازل و يخليها عليه المرة دى

و يروح يدور فى الشركات العادية

و يبتدى يعرف حاجات جديدة

ماتعلمهاش فى الكورس اللى دفع فيه دم قلبه

يبتدى يعرف ان الموظف المبتدىء لازم يكون خبرة سنتين

يعنى لما تلائى اعلان طالبين ناس مبتدئين

اعرف انهم عايزين خبرة سنتين

و طبعاً دى حاجة إحنا لازم نحفظها مش أكتر

لأن لو حاولنا نفهمها مش هتتفهم

يعنى ايه مبتدىء و خبرة سنتين

انا عن نفسى مش عارف لغاية دلوئتى

لو فى حد عملها قبل كده يا ريت يقولى

و يعرف كمان إن مواعيد الشغل " الطبيعية " من 10 الى 12 ساعة

و ان موضوع 8 ساعات ده يعتبر " بارت تايم " يعنى حاجة كده دلع

و لازم كمان الواد يكون صايع و مقطعها

لأنه لو هيتفق مع شركة على مرتب

ممكن ياخدوا منه فلوس أول كل شهر

فلازم يبئى واد صايع و أرارى

علشان يعرف يتفق على قرشين يعرف ياكل بيهم

ده غير انه لازم يجيد على الأقل أربع لغات حية و سبع لغات ميته

و يكون بيعرف يغسل ويمسح ويكنس و يعمل شاى و قهوة

و لو الشغل اللى هو هينزل فيه لازم يبئى فيه " تيم ورك "

لازم يكون بيعرف يشتغل كتيم ورك لواحده

يعنى الواد لازم يبئى فى امكانيات فريق

زى المارينز بتوع البحرية الأمريكانية

الواحد منهم ينزل على بلد يقفلها

فانت لازم تنزل على الشغل تقفله

مافيش حاجة اسمها تخصصات

انت يا باشا متخصص فى كل حاجة

و يرجع الواد يا حبة عينى

" مهزوماً مكسور الوجدان "

و ان كل اللى عملته له الشهادة

انها ادته فرصه انه يروح الشركات دى

و يحط فيها السى فى بتاعته

و كتر خير الدنيا على كده

و أكتر من كده يبئى طمع و افترا

مهو الواحد مش هياخد كل حاجة من الدنيا

كفاية عليه حاجة واحدة

و انت خدت شهادة ... خلاص عايز ايه

عايز تشتغل كمان ...

انت عبيط يا بنى !!

1

شارك هذا الرد


رابط المشاركة
شارك الرد من خلال المواقع ادناه

معك حق اخي في كل اللي قولته

انا لسه متخرج وبدأت ادور علي وظيفه وكل ما اشوف وظيفه مبرمج مبتدأ الاقي عايزين خبره سنتين ويكون عارف معظم لغات البرمجه ولغات الويب والداتا بيز ويعرف في يشتغل في فريق عمل

مش حرام الكلام ده برضه

ازاي نجيب خبره من غير ما نشتغل وازاي هنشتغل من غير خبره

0

شارك هذا الرد


رابط المشاركة
شارك الرد من خلال المواقع ادناه

السلام عليكم

اولا

شكرا على موضوعك

ثاني

انا اتخنقت جدا لما قريت موضوعك لأنى لسه فى بداية الطريقة وفى السنة الاخيرة من الكليه وناوى ان شاء الله لما اخلص اخد كورس

C# MCTS

فلما اشوف كلام حضرتك اكيد ححرم نفسى حتى انى احلم بالوظيفة

انا مبحبش الكلام اللى يكسر المجاديف ده

وعلى فكره انا من الناس اللى املهم كبير فى ربنا سبحانه وتعالى

مابالك لو واحد من الناس اللى بييأسو بسرعه لو شاف الكلام ده ممكن يجراله حاجه

انا اسف على طريقتى فى الكلام بس اصلى صعبان عليا ان العمليه تتعقد اكتر ما هيا متعقدة

وشكرا ليك

واتمنى لما تشتغل ان شاء الله تكتبلنا مقال جديد يزود الامل جوانا بدل ما يقضى عليه

ههههههههههههههههههههههههه انا اسف انا بضحك على حاجه تانيه بره الموضوع انا مشترك فى المنتدى من سنة 2004 ومشاركاتى 23 مشاركه بس

يادى الكسوف

تم تعديل بواسطه hisham2007
0

شارك هذا الرد


رابط المشاركة
شارك الرد من خلال المواقع ادناه

السلام عليكم ورحمة الله وبركاته

اولا اخي العزيز الموضوع مش موضوع امل بس

انا الحمد لله من اكثر الناس املا في الحياه وعمري ما يأست اني الاقي وظيه وانا مقتنع اني لسه في اول الطريق وعمره ما هيبقي سهل ابدأ

بس علشان اكون قد وظيفه معينه لازم اكون وائق من قدراتي علي الشغل

وكمان موضوع الشركات مش تخييب للامال ولا حاجه ده واقع ولكن ليس الكل انما المعظم

وكمان الشركات مبقتش عايزه موظفين لسه هتعلمهم يشتغلوا هي عايزه موظف يروح جاهز علي عمل مشاريع كبيره وضخمه

وياريت لو فيه شركات لتدريب المبرمجين المبتدأين علي الشغل وتعليمهم العمل في فريق جماعي والمشاركه في مشاريع حقيقه الهدف منها الارتقاء بمستواهم حتي يتطيعوا ان يجدوا وظيفه بسهوله

وشكرا اخي وخلي عندك امل كبير والحمد لله فرض التوظيف كتيره بس اللي يثبت نفسه ان يستحقها

تم تعديل بواسطه khaled_tiger
0

شارك هذا الرد


رابط المشاركة
شارك الرد من خلال المواقع ادناه

مرحب بيكم يا شباب

منورين الموضوع و الله

ان بس يمكن ماوضحتش انا عايز اقول ايه بالظبط

لكن واجب عليا التوضيح علشان ماحدش يفهمنى غلط ... :rolleyes:

بإختصار كده الكلمتين اللى فوق دول سخرية من الواقع اللى إحنا عايشين فيه

مش يأس .. وليعاذ بالله

انا بسخر من نفسى أولاً لأنى كنت مغفلاً ... ( على رأى عبد المنعم مدبولى :D )

و بسخر من شركات البرمجة اللى عندنا فى مصر ...

لأنى كنت فاكر انى مجرد ما هاخد الشهادة .. خلاص هنزل اى شركة تعجبنى و اشتغل فيها

لكن لائيت ان فى شركات ماتعرفش ايه الشهادة دى اساساً

و اخرها واحد قالى " انت بالشهادات دى تروح تدرس احسن لك :wacko: "

و بسخر من الشركات

لأن و لله الحمد معظم اللى فاتحين شركات برمجة هنا فى مصر تقريباً متخلفين

أو حد فى عليتهم كان عيان بحاجة :blink:

لأن زى ما خالد بيقول :

كل ما اشوف وظيفه مبرمج مبتدأ الاقي عايزين خبره سنتين ويكون عارف معظم لغات البرمجه ولغات الويب والداتا بيز ويعرف في يشتغل في فريق عمل

و دى حاجة تحرق الدم بس تضحك فى نفس الوقت

و فى النهاية انا حبت اوضح ان الشهادات مش هى اللى بتعمل بنى أدم و له وزن

الشهادة دى تقدر تقول إنها تدعيم لوضعك مش أكتر

إنما ماحدش يفتكر إن الشهادة هى اللى هتشغله

لاء

انت اللى هتشغل نفسك مش الشهادة

و عايز اقولك حاجة يا هشام

انت ممكن تشتغل و انت لسه فى الجامعة

الحكاية دى بإيد ربنا مش بإدينا

يعنى اياك تيأس حتى لو الدنيا كلها مكتئبة و لونها اسود محروق

كمل يا باشا طريقك

بس يا ريت تمشى صح و توصل و ماتفكرش إن حد هيساعدك أو هيوصلك غير ربنا

و على فكرة بص للتوقيع بتاع خالد

النجاح الوحيد في الحياة هو أن تستطيع أن تحيا حياتك بالطريقة التي تريدها

يعنى يكفى إن انا لغاية النهاردة علمت اللى انا عايز اعمله و الحمد لله

برغم اعتراضات الناس كلها تقريباً

و ده موضوع كبير و مش وقته

و موضوع الشغل ده بئى .... أكيد ليه وقته ..... و هيجى ........ كله بإذن الله :)

0

شارك هذا الرد


رابط المشاركة
شارك الرد من خلال المواقع ادناه

السلام عليكم ورحمة الله

فعلا اخي الكريم python كلامك سليم

وكمان مش اي واحد هتقابله مشكله ولا اتنين في اول الطريق هيقف ومش هيكمل بالعكس ده المفروض يكمل باصرار علشان يثبت للناس انه قد المسئوليه و انه يقدر يصل لمكانه كبيره في تخصصه مع تقدم الخبره طبعا

وكمان كان فيه معيد اعرفه في جامعة عين شمس هو ماشاء الله مستواه لاويصف في البرمجه ومع ذلك هو لايعمل في اي شركه برمجه ولكن يعمل معيد في الجامعه

وسالته عن التوظيف ونظام الشغل في مجال الكمبيوتر اونهم عايزين خبرات والكلام ده قاللي الكلام ده كله بيتقال علشان يجيبوا ناس مستواها عالي في الاول انما قاللي قدم في اي وظيفه تقابلك حتي لو اترفضت هما هيضربوك لو اترفضت ولو اتقبلت تبقي حاجه كويسه

فالكلام كله علي الثقه بالنفس وتكون وائق من مستواك وانك تقدر تسد في الوظيفه قدم حتي لو طالبين 3 او 4 سنين خبره

ماهو مفيش حد بيبدأ خبير . ولا ايه؟

0

شارك هذا الرد


رابط المشاركة
شارك الرد من خلال المواقع ادناه

ما هو انت راجل مؤمن

يعنى عارف ان كل واحد و ليه رزقه و ربنا هو اللى بيبعت له الرزق ده

و مايصحش ان الواحد يزعل ان ربنا مابعتلوش رزقه فى الوقت اللى الواحد عايزه

لاء ..

ربنا هو اللى بيقدر الرزق ده و هو اللى بيقدر الوقت اللى يبعته فيه

إحنا علينا نسعى ... حتى لو رزقك ده جالك قبل ما تموت على طول

مافيش يأس من حاجة و الحمد لله

و انا على فكرة ناويت اعمل زى ما المعيد ده ما بيقول ...

يا راجل ده انا فكرت ازور الـ CV و اتقدم لوظيفة Senior Developer :D

0

شارك هذا الرد


رابط المشاركة
شارك الرد من خلال المواقع ادناه
و انا على فكرة ناويت اعمل زى ما المعيد ده ما بيقول ...

يا راجل ده انا فكرت ازور الـ CV و اتقدم لوظيفة Senior Developer

هاهاهاهاهاهاهاهاهاها

انا فعلا عملت كده قدمت في واحده ومنفعتش قدمت النهارده في واحده تانيه وهفضل كده لغاية ان شاء الله ما اشتغل

0

شارك هذا الرد


رابط المشاركة
شارك الرد من خلال المواقع ادناه

هى الشهادة طلعت فشنك خلاص حتى فى النت

المصيبة فيه ناس بتكوون عارفه حاجات كبيرة ومعلومات مش موجوده عندة الايتهات فى الشبكات والبرمجة والانظمة

بس مش بتاخد شهادات وشغالة

اومال لو اخدت شهادة حتعمل ايه

يا خوانا موضوع الشهادة بقى بح كان زمان وجبر

اللى عايز يشتغل فعلا يطور امكانياتو واساليبو فى الشغل سواء لوحدو او مع مجموعة

ويتعلم لوحدو لو البنى ادم لو اتعلم لوحدو خبرتو بتزيد بسرعة (منو فيه) وبيعرف ايه الصح وايه الغلط

اما الوظيفة فى الاول والاخر بيد ربنا مش بيدنا

لا حول ولا قوة الا بالله

0

شارك هذا الرد


رابط المشاركة
شارك الرد من خلال المواقع ادناه

diedo_1

بالظبط كده

0

شارك هذا الرد


رابط المشاركة
شارك الرد من خلال المواقع ادناه

السلام عليكم

عارفين انا من كتر ما زهقت من شركات البرمجة فى اسكندرية

بضور على شغلانة تانية والبرمجة تبقه هوايتى

ما انا هعمل ايه

اتعلم بيسك 6 يقولوا عايزين فوكس برو ادرسه يقولوا دوت نيت

0

شارك هذا الرد


رابط المشاركة
شارك الرد من خلال المواقع ادناه

sayedall

و الله يا بنى اللى يمشى ورا مطالب الشركات

مش هيتعلم حاجة

زى ما انت بتقول

تعلم دوت نت

تلائى يقولك عايزين جافا

تتعلم PHP

يقولك طب معلش ASP

انا قعدت مرة حصرت التقنيات و اللغات الموجودة

قلت لما اشوف كده لو حطتلها جدول و اتعلمتها

لائيت انى ادامى كتييييييييييييييييييير اوى و إحتمال اموت قبل ما اخلص

و لما فكرت زى الناس

لائيت انى مش محتاج اتعلم ده كله

كل اللى انا محتاجة

لغة برمجة واحدة بس لزوم البرامج بتاعة الويندوز

و لغة تانية لزوم الويب

و SQL

و شكراً على كده

إنما الهبل اللى بتطلبه الشركات ده مالناش دعوة بيه

يا عم انا بحب البرمجة مش بحب الشركات :D

0

شارك هذا الرد


رابط المشاركة
شارك الرد من خلال المواقع ادناه

السلام عليكم :-

موضوع قيم ، وأحب أشارك فيه ببعض المعلومات :-

1-أولا ان المبتدئ عندما يقرأ موضوع كهذا فطبعا هيجيله احباط ، بس لو فكرنا بطريقة منطقية حنلاقى ان معظم من يكتبون المواضيع هم من لم يجدوا وظيفة بعد ( النصف الفارغ من الكوب ) بينما من وجدوا وظيفة ( النصف الملئ من الكوب ) لن تجدهم يكتبون مواضيع ليقولوا فيها ( باركولنا يا جماعة ، لقيت شغل بمرتب كبير ) ، فاذن الصورة بتظهر غير كاملة للمبتدئين.

2- البحث عن الوظائف الأفضل يكون من خلال المجموعات البريدية الخاصة باعلانات الوظائف فى ال yahoo groups ، فده أفضل بكتير من الأهرام والجرايد بصفة عامة

3-فعلا ظاهرة ان شركات كتيرة بتطلب ان المبتدئ junior يكون عنده خبرة سنة على الأقل ، وشفت شركات بتطلب 3 سنين خبرة لل junior ، لكن شفت عدد جيد من اعلانات الوظائف بتطلب من 0 الى 1 سنوات خبرة ، يعنى ممكن بدون سنوات خبرة تتقدم لهذه الوظيفة . وده شئ منطقى برضه لأن اللى عنده خبرة ده بيكون بالفعل شغال فى شركة تانية ( اللى خد فيها سنين الخبرة ) ، فمعنى كده ان الأعلان بيقول ( اترك الشركة اللى انت شغال فيها حاليا ، واللى خدت منها الخبرة ، وتعال اشتغل معانا بخبرتك على الجاهز ) ، فطبعا المبرمج اللى عنده خبرة ده مش هيترك عمله فى شركة ويروح لشركة تانية الا اذا كانت هتعطيه ضعف المرتب " وفى ذلك تلاحظ انهم يطلبوا من المتقدم تحديد المرتب المتوقع منه مع تقديم ال CV "

، فاذا كانت الشركة فاتحة جديد و ميزانية المرتبات مش كبيرة ، فلازم تشغل ناس جداد

=================================================================

- بصراحة الشرط اللى فعلا عقبة هو شرط " بكالوريوس كلية حاسوبية " ، فانا خريج صيدلة ، وكنت استعد لاخذ دورات فى ال dotNET وشهادات ميكروسوفت طبعا ، ولكن عندما عملت بحث فى اعلانات الوظائف فى ال yahoo groups ، على ال dotNET junior ، وجدت ان 80 % من الاعلانات طالبة بكالوريوس كلية حاسوبية كشرط أساسى

- ولأنى لم أكن قد تعمقت بعد فى ال dotNET قررت ترك البرمجة خالص ، والتوجه الى مجال الجرافيك

تابعوا معى هذا الموضوع ، فله صلة وثيقة بنفس القصة

بصراحة يا جماعة ، ما فرصة خريجى الكليات "الغير حاسوبية" فى مجال البرمجة ؟

- ياريت نتبادل الخبرات فى هذا الموضوع الهام جدا ، ونسمع مزيد من الآراء والمشاركات .

0

شارك هذا الرد


رابط المشاركة
شارك الرد من خلال المواقع ادناه
-أولا ان المبتدئ عندما يقرأ موضوع كهذا فطبعا هيجيله احباط ، بس لو فكرنا بطريقة منطقية حنلاقى ان معظم من يكتبون المواضيع هم من لم يجدوا وظيفة بعد ( النصف الفارغ من الكوب ) بينما من وجدوا وظيفة ( النصف الملئ من الكوب ) لن تجدهم يكتبون مواضيع ليقولوا فيها ( باركولنا يا جماعة ، لقيت شغل بمرتب كبير ) ، فاذن الصورة بتظهر غير كاملة للمبتدئين.

فعلاً عندك حق

انا عايز اللى يقرأ الموضوع من المبتدئين يعرف ان الدنيا مش وردى

و انه هيطلع عينه على ما يعرف يعمل حاجة ... أو ممكن تبئى سالكة معاه و مايطلعش عينه ولاحاجة

بس انا عايز الناس ماتحطش فى دماغها إن الشهادة دى هتخلى الشركات تخطفة

انا حبيت انبه الناس للنقطة دى

و فعلاً انا مالحظتش حد اشتغل و حكى تجربته مع الشغل .... بس عادى

إحنا اهو بنقول انت ممكن تشتغل بمرتب عالى زى ما انت عايز

و ممكن تشتغل ببلاش

و ممكن ماتشتغلش اصلاً

المشكلة ان الناس - و انا كنت واحد منهم - فاكرين انه بمجرد الحصول على الشهادة

هيلائى الشركات واقفة على بابه و بتتحايل عليه علشان يشتغل معاهم

انا عايز الناس تبطل الحكاية دى

بصراحة الشرط اللى فعلا عقبة هو شرط " بكالوريوس كلية حاسوبية " ، فانا خريج صيدلة ، وكنت استعد لاخذ دورات فى ال dotNET وشهادات ميكروسوفت طبعا ، ولكن عندما عملت بحث فى اعلانات الوظائف فى ال yahoo groups ، على ال dotNET junior ، وجدت ان 80 % من الاعلانات طالبة بكالوريوس كلية حاسوبية كشرط أساسى

- ولأنى لم أكن قد تعمقت بعد فى ال dotNET قررت ترك البرمجة خالص ، والتوجه الى مجال الجرافيك

دى برضه حاجة تانية من غباوة الشركات

هو ماله اللى هيشتغل ده درس ايه

المفروض ان صاحب الشركة ده فى يوم من الأيام كان فى الجامعة

و عارف إن الجامعة دى مجرد شكليات مش علم

بس هنقول ايه

غباوة

0

شارك هذا الرد


رابط المشاركة
شارك الرد من خلال المواقع ادناه

السلام عليكم

فعلا مشكلة المؤهل ديه مشكلة حقيقية ومواجهانى حتى منح البرمجة ﻻزم يكون مؤهل عالى وانا معهد

0

شارك هذا الرد


رابط المشاركة
شارك الرد من خلال المواقع ادناه

السلام عليكم

شباب أن من سوريا ويمكن أوضاع العمل لدينا بالنسبة لجماعة الـ IT أصعب من أي بلد تاني

كنت بعرف إنو ما رح لاقي شغل ببلدي .. وحطيت براسي إني رح سافر أول ما خلص الـ MCSE

تعذبت كتير .. وعملت مقابلات عمل كتير ..

يمكن أنا بطل العالم في المقابلات .. وبالأخير عرفت إنو الله ما كاتبلي سافر .. وعرفت إنو في حكمة من ورا هالإرادة الإلهية ..

والحمد لله هلأ وبعد 4 سنين من إنهائي للشهادة .. حصلت على شغل محترم في بلدي سوريا وفي مدينتي حمص ..

ما حدا بيعرف الله شو كاتبلو يا شباب .. ما حدا بيعرف رزقتو وين .. بس رب العالمين بيعرف ..

وهيك .. نحنا علينا إنو ناخد بالأسباب .. إن كان بالنسبة للشغل أو أي شي تاني .. يعني ندرس ونشتغل على حالنا .. والباقي على رب العالمين ..

ما تيئسوا إذا الشغل أخد وقت بينما يجي .. لإنو هادا كلو في من وراه حكمة إلهية ..

وتقبلوا تحياتي ..

أخوكم محمد

0

شارك هذا الرد


رابط المشاركة
شارك الرد من خلال المواقع ادناه

Hammady

منور انت و اهل سوريا كلهم

الحكاية مالهاش دعوة باليأس خالص على فكرة

هو بس انا عايز الناس ماتحطش فى دماغها ان الشهادة دى هى اللى هتشغله

و على فكرة انا شغال مصمم جرافك

يعنى مش عاطل ... الحمد لله :D

0

شارك هذا الرد


رابط المشاركة
شارك الرد من خلال المواقع ادناه

أكيد مو شغلة يأس أخي الكريم

بس عنا حتى الأكاديميين مو ملاقيين شغل .. يعني الشغلة مو بس على الشهادات التقنية

وشكرا على ترحيبك الجميل

0

شارك هذا الرد


رابط المشاركة
شارك الرد من خلال المواقع ادناه

و على فكرة انا شغال مصمم جرافك

-الحمد لله ، أيوه كده سمعنا أخبار ايجابية جميلة :) ، خاصة انى ناوى أدخل منحة وزارة الاتصالات تراك جرافيك ( مكونات دراسته فى العام السابق كما هو مكتوب فى موقع مركز YAT عبارة عن شغل ال 2D PhotoShop-Illustrator-Flash-Dreamweaver وكذلك ال 3D 3Ds Max -Charachter studio - Combustion

وملتيميديا Premiere-Macromedia Director-Sound Forge

-فيا ترى ما هو الحال فى مجال الجرافيك ؟ اللى فهمته من الموضوع انك كنت واخد certification فى البرمجة وليس فى الجرافيك .وهل ياترى لقيت شغل بسهولة نسبيا ، ولا بعد مقابلات كتير ؟ . وياترى هل مرتبات الجرافيك بتكون فعلا أقل من مرتبات البرمجة بصفة عامة ؟( ياريت نصايحك الغالية فى هذة الجزئية ، المنحة نزلت فعلا ولازم أختار تراك بسرعة ، وأنا كنت ناوى على برمجة ميكروسوفت .NET لكن كما ذكرت أنا لقيت من أعلانات الوظائف أن تخصص الجرافيك مفتوح أكتر بكتير لخريجى الكليات الغير حاسوبية مقارنة بتخصصات البرمجة)

0

شارك هذا الرد


رابط المشاركة
شارك الرد من خلال المواقع ادناه
الحمد لله ، أيوه كده سمعنا أخبار ايجابية جميلة regular_smile.gif

و الله يا جدعان انا مش كاتب الموضوع من قبيل اليأس ولا حاجة

ده بس توعية للناس مش أكتر :)

فيا ترى ما هو الحال فى مجال الجرافيك ؟ اللى فهمته من الموضوع انك كنت واخد certification فى البرمجة وليس فى الجرافيك .وهل ياترى لقيت شغل بسهولة نسبيا ، ولا بعد مقابلات كتير ؟ . وياترى هل مرتبات الجرافيك بتكون فعلا أقل من مرتبات البرمجة بصفة عامة ؟( ياريت نصايحك الغالية فى هذة الجزئية ، المنحة نزلت فعلا ولازم أختار تراك بسرعة ، وأنا كنت ناوى على برمجة ميكروسوفت .NET لكن كما ذكرت أنا لقيت من أعلانات الوظائف أن تخصص الجرافيك مفتوح أكتر بكتير لخريجى الكليات الغير حاسوبية مقارنة بتخصصات البرمجة)

بص يا سيدى .. صلى على النبي .. ( عليه الصلاة و السلام )

الموضوع اللى احنا فيه ده مش موجه للناس اللى هتاخد شهادة فى البرمجة و بس

لاء موجه لكل واحد عايز ياخد شهادة علشان يشتغل بيها

يعنى انت عايز تدخل المنحة علشان تاخد شهادة المنحة و تشتغل بيها

كويس .. جميل .... ربنا معاك و يوفقك فيها

بالنسبة لى انا

انا شغال مصمم جرافيك بئالى خمس سنين

قعدت حوالى سنتين تصميم و شغل دعاية

و بعد كده نقلت على معامل الطباعة

بالرغم من ان شغل المعامل يعتبر أقل من الناحية الإبداعية و الأبتكارات و كده

بس شغل الدعاية بالنسبة لى كان مقرف زيادة عن اللزوم

لأن الناس عايزة تعمل اللى هيا عايزاه و ماحدش سايبك تبدع فى شغلك

يعنى كنت بحس انى شغال دراع مش دماغ

و تقريباَ مافيش شغل فى الجرافيك غير مجال الدعاية و معامل الطباعة و الأستوديوهات

مع ان المفروض فى مجالات كتير الجرافك بيخدمها

بس هنا فى مصر .... انت عارف بئى.

و بخصوص المرتبات

هى تقريباً نفس المرتبات فى المجالين

بس يمكن البرمجة اعلى شوية

الجرافيك كويس برضه بس مش أى شركة هتديك مرتب عالى

المهم

انا واخد MCAD و دى فى البرمجة

بس انا اتعلمت الجرافيك لأنى كنت برسم

و لما اشتغلت على الكمبيوتر نقلت الرسم من الورق للكمبيوتر

يعنى انا اتعلمته مش علشان اشتغل بيه

فالحمد لله اتعلمته بضمير

و على فكرة انا اتعلمته من مواقع فى النت مشهورة و كبيرة

و أصحابها فنانين جامدين اوى

و ماخدش فيه كورسات ولا شهادات ولا اى حاجة

و موضوع انى اشتغل بيه ده جه كده لواحده

انا مكنتش حاطط فى دماغى

انا كنت ساعتها بشتغل فى صيانة الكمبيوتر

و جت فرصه انى اشتغل جرافيك

و مجال الجرافيك هنا مفتوح لأى تخصص مش مهم انت بتدرس ايه

انا كان معايا واحد فى الشغل معاه إبتدائية .. و كان شغال و شغله ممتاز

يعنى ماتقلقش من الناحية دى

بس فى شركات كبيرة بتطلب خريجى فنون تطبيقية و ماشابه

و لو بتدور على شغل بره البلد هتلائى معظم الطلبات عايزين فنون تطبيقية

البرمجة للأسف اصحاب الشركات متزمتين شوية فى الموضوع ده

يعنى غالباً لازم تبئى خريج حاجة ليها علاقة بالحاسب

زمان من حوالى 6 أو 7 سنين ماكنش فى الكلام ده

كان بكالريوس تجارة شغال بروجرامر

دلوئتى بئى صعب

من ناحية انك ممكن تلائى شغل بسرعة أو مش بسرعة

دى حاجة بتاعة ربنا و مالهاش علاقة بأى حاجة

يعنى انت تعمل اللى عليك مش أكتر

إنما هتشتغل امتى دى

الله اعلم

و زى ما انت شايف كل الشركات عايزة ناس خبرة

اى مجال يفضل الناس الخبرة

يعنى حاول لما تنزل تدور على شغل تبئى خبرة ساعتها

انا اللى نفعنى فى الشغل زى ماقلت لك

انى اتعلمته لأنى كنت عايز اتعلمه

فاتعلمته كويس

و بئت خبرة قبل ما انزل شغل

و على فكرة لما نزلت شغل لائيت انى متعلم حاجات كتير أوى الشغل مش محتاجها

و دى كانت خيبة أمل ... بس ماعلينا

مش عايزك تغلط الغلطة بتاعة معظم الشباب

انه يتعلم اى حاجة وخلاص

معلش اقعد مع نفسك شوية و شوف انت بتحب ايه

أو دماغك ممكن تشتغل فى ايه

و إلا مش هتنفع فى اى شغلانة

انا غلطتى

انى اعتمدت على انى اخد شهادة

و بعد كده ابئى اخد خبرة من الشغل

مع انى بحب البرمجة و كنت مخطط انى اتعلمها من زمان

بس معلش ... محدش ماشى صح على طول

وربنا يوفقك و يوفق الجميع

0

شارك هذا الرد


رابط المشاركة
شارك الرد من خلال المواقع ادناه

- الله يكرمك ، و يزيدك علم وخبرة

.استفدت جدا من كل هذه المعلومات والنصائح القيمة ، وفيه ناس كتير أعرفهم محتاجين المعلومات دى ، سأنقلها لهم وكله فى ميزان حسناتك.

- وأنا كده اطمنت ان مجال الجرافيك يعتبر مجال جيد (للمجهتدين فيه طبعا) ، وان شاء الله هدخل تراك جرافيك.

- وفاهم نصيحتك الذهبية كويس ، ومش هاعتمد على انى أخدت شهادة معتمدة ، بل هاعمل شغل بايدى كتير عشان آخد خبرة حقيقية

*بس فيه ملحوظة صغيرة كده

و تقريباَ مافيش شغل فى الجرافيك غير مجال الدعاية و معامل الطباعة و الأستوديوهات

مع ان المفروض فى مجالات كتير الجرافك بيخدمها

بس هنا فى مصر .... انت عارف بقى

أنا ملاحظ انك ماجبتش سيرة خالص لشغل تصميم الويب web Designer اللى هو يعنى ال Flash,Actionscript,CSS,Styles ,Dreamweaver

أنا كنت متخيل ان شغل تصميم الويب هو مجال العمل الرئيسى فى الجرافيك بصفة عامة

- لان انا باشوف اعلانات كتير جدا طالبة مصمم ويب ويكون موهوب فى الفلاش وما الى ذلك

-وكذلك يعنى اللى لاحظته (فى اعلانات مصمم الويب دى ) ان يعنى لو طلبوا كلية فى نسبة منها ، بيطلبوا برضه حاسبات ومعلومات ، وما شفتش أى اعلان طالب فنون تطبيقية ، على الرغم من أن عدد كبير منها لوظائف فى السعودية والكويت والامارات

-( يمكن بيطلبوا فنون تطبيقية فى اعلاتات شركات الدعاية أو الستوديوهات مثلا ؟)

(يعنى ده اللى شفته فى اعلانات ال yahoo groups

Developers_For_Ever -egypt-programmers-Egypt-IT-Jobs

-ياريت نسمع تعليقك على الملحوظة الأخيرة ويبقى أتممت جميلك

0

شارك هذا الرد


رابط المشاركة
شارك الرد من خلال المواقع ادناه
أنا ملاحظ انك ماجبتش سيرة خالص لشغل تصميم الويب web Designer اللى هو يعنى ال Flash,Actionscript,CSS,Styles ,Dreamweaver

انا ملاحظ برضه انى مجبتش سيرة الموضوع ده :D

سورى يا باشا .. جل من لا يسهو

مع ان دى منطقة مهمة فى الجرافك

أصل بعيد عنك معظم اللى بيطلب Web Developer يببئى عايزة Designer فى نفس الوقت

بس فى شركات كتير بتطلب ده لواحدة و ده لواحدة

أنا كنت متخيل ان شغل تصميم الويب هو مجال العمل الرئيسى فى الجرافيك بصفة عامة

مش بالظبط و الله .. بس هو ليه مكان كبير ..

و كمان الويب مش محتاج شغل جرافيك جامد زى مجال الدعاية و الثرى دى

و كمان ده فيه حته برمجة

لأنك لو هتشتغل Web Designer يبئى لازم تعرف CSS و شوية Xml و طبعاً أساسيات Html

و عندك Action Script لو هتشتغل بـ Flash ... و أكيد هتشتغل بـ Flash.

وكذلك يعنى اللى لاحظته (فى اعلانات مصمم الويب دى ) ان يعنى لو طلبوا كلية فى نسبة منها ، بيطلبوا برضه حاسبات ومعلومات ، وما شفتش أى اعلان طالب فنون تطبيقية ، على الرغم من أن عدد كبير منها لوظائف فى السعودية والكويت والامارات

-( يمكن بيطلبوا فنون تطبيقية فى اعلاتات شركات الدعاية أو الستوديوهات مثلا ؟)

ما انا بقلك

مجال الجرافيك مش بيهتم أوى بنوع الكلية اللى انت متخرج منها

إلا بعض الشركات و دى بتبئى قليلة .

و انا شفت اعلانات فى الجُرنال طالبين فنون تطبيقية

غالباً حتى الإعلان بيبئى بالإنجليزى ... ( مع إن الشغل فى مصر :D )

بس مش كتير

نصيحة بئى تانية

لو ناوى على Web Designer

ركز على الفلاش و الأكشن اسكربت أهم حاجة

و بعد كده يجى ألفوتوشوب لأنه من أهم الأدوات اللى هتشتغل بيها

و الباقى طبعاً مش هتسبهم

بس دول اللى تركز عليهم كتير.

و نسمع عنك خير إن شاء الله

0

شارك هذا الرد


رابط المشاركة
شارك الرد من خلال المواقع ادناه

ايه كلام ده ده يا جماعة انا قلقت اوي بصراحة ؟ انا كنت بعتقدي زي اعتقاد الاخ python انو لاما اخلص كليتي حاخد كورس اوركل حوالي سنة او سنتين بعدين اشتغل ,ده رغم اني معرفش عنه اي حاجدلؤتي لاني بدرس في كلية تجارة , وبصراحة انا عاشق للكمبيوتر ونفسي اشتغل في المجال ده

انا اعرف انو شركات بتعمل حركات قرعة كتير ؟؟؟؟ بس مش لدرجة ديه

وبينيوبنكو يا جماعة ما اكيد اي شركة حتعمل الكلام ده لما تلقي ادمها عدد كبير من المتقدمين حتنقي احسن احسن المتقدمين

ومن الاخر الموضوع قلقني اوي انا كنت بحسب انو سوق العمل محتاج ناس بتشتغل في داتا بيس وكده وانو اول ما تخرج واخد كورس يعني مع شوية تدوير حلاقي انشاءللة لكن بطريقة ديه ؟ يعني ناس متخرجة من كلية هندسة زيكو وخدو كورسات وملقوش شغل؟؟؟؟؟؟؟؟؟؟؟؟؟؟؟؟؟ اما احنا بقي حيجري فينا ايه ربنا يستر

0

شارك هذا الرد


رابط المشاركة
شارك الرد من خلال المواقع ادناه
يه كلام ده ده يا جماعة انا قلقت اوي بصراحة ؟

عايزك تقلق على الأخر .. المنطقة دى فيها لبش جامد :blink:

يعني ناس متخرجة من كلية هندسة زيكو وخدو كورسات وملقوش شغل؟؟؟؟؟؟؟؟؟؟؟؟؟؟؟؟؟ اما احنا بقي حيجري فينا ايه ربنا يستر

ده انتوا هيتعمل فيكم عمايل :wacko:

شوف يا باشا

فى شركات مش بتفرق معاها انت فى كلية ايه

و فى ناس بتشتغل على طول من غير لف ولا دوران

و انا على فكرة مش هندسة

انا كلية تجارة بس قسم حاسب ألى

و القسم ده مش موجود غير فى التعليم المفتوح و فى جامعة عين شمس فقط

زيه زى اى كلية computer Science

شوف

اى حاجة انت بتحبها

ادخل فيها على طول و ما تحطش فى دماغك حاجة

ده لو بتحبها

وخليها على الله يا عم احمد ماحدش بياخد غير نصيبه

0

شارك هذا الرد


رابط المشاركة
شارك الرد من خلال المواقع ادناه

ده رغم اني معرفش عنه اي حاجدلؤتي لاني بدرس في كلية تجارة , وبصراحة انا عاشق للكمبيوتر ونفسي اشتغل في المجال ده

أنا لقيت عدد جيد من اعلانات الوظائف ،بتطلب ناس متخصصين فى Oracle Financial وبتكون أحد الشروط انه يكون خريج تجارة. يعنى لو ركزت فى هذا التخصص حتكون كلية التجارة ميزة قوية ليك(لأنه واضح ان هذا التخصص معتمد على الحسابات التجارية والمالية ، وبالتالى دراسة تجارة مفيدة جدا فيه ) . بس طبعا المفروض تبدأ من الآن فى قراءة كتب الكترونية تعليمية فى هذا المجال ، ومتابعة أحدث الأخبار من خلال موقع أوراكل ، وكذلك قسم منتدى الأوراكل هنا ، وكذلك

مجموعة مستخدمي أوراكل العربية

- فاذا كنت باذن الله من "المتميزين" فى هذا التخصص ، فباذن الله تفاءل خير ، لأن صحيح فيه أعداد كبيرة من الناس فى كل التخصصات فى كل المهن بصفة عامة ، لكن الناس المتقنة اللى بتعمل شغل صح قليلين جدا . ومجال الكومبيوتر بالذات فيه مساحات كبيرة جدا للتميز .

- لكن لا تدخل هذا المجال لتكون مجرد مبرمج عادى "زى الناس " ، أدخله اذا كنت مؤمن بتميزك فيه فقط ، والتميز لا يأتى من فراغ ، ولكن بالاعداد الجيد من خلال ما سبق ذكره .

====================================

-تحية كبيرة جدا لpython ، ( أنا من هذا المكان أرشحه لجائزة العضو المميز ، فالعبرة ليست بعدد المشاركات ، ولكن "بقيمة" المشاركات )

0

شارك هذا الرد


رابط المشاركة
شارك الرد من خلال المواقع ادناه

من فضلك سجل دخول لتتمكن من التعليق

ستتمكن من اضافه تعليقات بعد التسجيل



سجل دخولك الان

  • يستعرض القسم حالياً   0 members

    لا يوجد أعضاء مسجلين يشاهدون هذه الصفحة .